6 gòdnika (sobòta) 2003 rokù w sedzbie Mùzeji Pismieniznë
ë Mùzyczi Kaszëbskò-Pòmòrsczi w Wejrowie òdbëła sã lëterackò-jãzëkòwô
seminarëjô kaszëbsczich pismienników. Króm wëżi wspòmnióny
Mùzeji òrganizatorã negò zéńdzeniégò béł Kaszëbsczi Jinstitut.
Na seminarëją skłôdałë sã przede wszëtczim dwa referatë, chterné
wëgłosëlë profesorzë Jerzi Tréder ë Jerzi Samp. Béł téż czas
na diskusëjã, òb czas chterny bëtnicë zéńdzeniégò mielë leżnosc
òdniesc sã do tegò, ò czim gôdelë referencë.
Jakno pierszi gôdôł prof. Jerzi Tréder. Przédną témą jegò
wëstąpieniégò béł Słownik języka pomorskiego, czyli kaszubskiego
Sztefana Ramùłta. Przë ti leżnoscë prof. Tréder pòwiedzôł
përznã swòjim słëchińcóm ò żëcym ë dzejanim S. Ramùłta.
Pò Trédrze wëkłôd miôł prof. Jerzi Samp. Gôdôł òn ò ùwôżanim
kaszëbsczi mòwë w naji pismieniznie. Ùznôł òn nã rzecz (ùwôżanié
ë tczą dlô swòji rodny mòwë) za jeden z nôwôżniészëch elemeńtów
lëteraturë, bez jaczi ni mòże sã òna dali rozwijac. Pòwòłiwôł
sã na cëtatë z kaszëbsczi lëteraturë, w jaczich bëło widzec
wiôldżé ùwôżanié dlô kaszëbiznë, mòwë starków. Terô zôs ti,
co zajimają sã pisaniém pò kaszëbskù w najëch czasach, téż
mùszą dali pòdtrzëmëwac nã wiôlga tczã dlô kaszëbsczégò jãzëka,
bò mòże to przëniesc bëlny brzôd ë dalszi rozwij naji pismieniznë.
Òb czas zéńdzeniégò dóné òsta téż bôczenié na to, jak sã gôdô,
nobilitacëjã kaszëbiznë, chtërna rozbrzëmiéwô terô nié blós
w chëczach a téż pałacach. Òznôczô to, że najô mòwa nie je
ju le gôdką lëdzy z niższëch dzélów spòlëznë, ale sta sã téż
jãzëkã pismienników.
Fòrmellów Słôwk
zaczątk
|