Kaszëbsczé Karno Sztudérów Tatczëzna, co dzejô przë Pòmòrsczi
Pedagògòwi Akademiji w Słëpsku przërechtowało cykl zéńdzeniów
zatitelowónych: Mòja kaszëbskô stegna. Rôczony na nie są lëdzë
z òkòlégò Słëpska, co są we wszelejaczi spòsób sparłãczony
z Kaszëbama.
Gòscë przedstawiają sztudéróm swòje dokònania jeżlë jidze
ò kaszëbiznã, a téż mają pòkazac młodim, jakã mają jiscstegną,
żebë jich dzejanié bëło lepszi.
Pierwszé zéńdzenié bëło 3 gòdnika 2003 r. na wëdzëlu Filologiczno-Historicznim
PPA-ù. Gòscã béł Róman Niklôs - czerownik Akademicczégò Òsédla
PPA-ù. Niklôs pòchòdzy ze Stãżëcczi Hëtë. Ùrodzył sã w Kòscérznie
w 1947 r. Tam skùńczëł Òglowé Liceum miona J. Wëbicczégò,
w klase gdze historëji ùcził „profesór” Krëbba. W tim to czasu
dzãka temù szkólnémù wzbùdzała sã w Niklôsu miłota do historëji
ë do Kaszub. Pózni historëjã sztudérowôł na Wëższi Pedagògòwi
Szkòle we Gduńsku. We Gduńsku òstôł nôleżnika Karna Sztudérów
Pòmòranijô. Czej zrobił magistra, krótkò robił na gduńsczi
ùczelnié. W 1971 r. przeniósł sã do Słëpska.
W gardze nad Słëpią Niklos wespół z jinszima pòdjął starã,
żebë ùtwòrzec part Kaszëbskò-Pòmòrsczégò Zrzeszeniégò. Pierwszô
próba pòwòłaniô négò partu bëła w strëmiennikù 1976 rokù.
Chãtnëch, żebë zapisac sã do K-PZ bëło 13 sztëk. Jednakò WSW
Wojewódzcczégò ùrzãdu w Słëpsku òdmówił rejestracëji partu.
Piãc lat pózni bëła drëgô próba, ë tej sã ùdało.
Pò welacëji, Niklôs zajął plac wiceprzédnika .
- Mòje dzejani w ZK-P – tołmaczëł gòsc - nie bëło za dłudżé.
Dozdrzôł jem, że ta òrganizacëja w wiôldżim dzélu stôwô sã
pòliticzną partëją. Wiele dzejôrzów, przënôleżnosc do ni wëkòrzistôwa
do pòlitëcznëch biôtków. W Zrzeszenim bëło za wiele nie-Kaszëbów
ë dlô mie nie miało to przełożeniô na jideowi założenia. Jô
nie widzôł ju dlô se placu w taczi òrganizacëje ë z ni wëstąpił.
Róman Niklôs twiérdzy, że nigdë nie traktowôł kaszëbiznë zawòdowò
ë nie robił na ni dëtków. Jednakò jinteresëje sã sprawama
swòji Môłi Tatczëznë ë sã z Nią utożsamia.
Drëdzi zéńdzenié z cyklu „Mòja kaszëbskô stegna” mdze 25 gromicznika,
a gòsca bãdze ksądz Mariusz Sënak, Kaszëba z prawosławny parafëji
w Słëpskù.
Lucyna Réter, Macéj Dorau
zaczątk |
