 |
| Młodé Żukòwò |
6 gòdnika mia môl w żukòwsczi restauracëji „Grif” wëdarzenié,
jaczé mòże bëc zôczątkã zjinaczeniô òglowégò pòzdrzatkù na kaszëbską
rësznotã. Ni ma co tuwò krëc, że w wiôldżim gardze kaszëbsczé
dzejanié parłączëło sã w pierszi rédze ze starszima lëdzama.
Mómë nôdzejã, że òrganizacyjné zéńdzenié Karna Kaszëbsczi Młodzeznë
gminë Żukòwò, ò jaczim tuwò piszemë, mdze zôczatkã procesu,
czej dlô młodëch kaszëbizna nie mdze ju wicy parłączëc sã leno
z malowóną skrzënią ë starkama kôrbiącëma midzë sobą w dzëwny
gôdce.
Młodi, a bëło jich dosc tëli, bò jaż 37 sztëk, w przëtomnoscë
Eùgeniusza Prëczkòwsczégò (m.jin. redachtóra magazynë Rodnô
Zemia ë przédnika Partë Kaszëbskò-Pòmòrsczégò Zrzeszeniô w Baninie),
chtëren wiele pòmógł w zrëchtowaniém negò jinaùgùracëjnégò zéndzeniégò,
przëjãlë sztatut ë regùlamin Karna, welowalë przédnictwò ë ùczëlë
wiele żëczbów ë rad òd przërôczonëch gòscy.
Karno przëjãło miano „Cassubia” na wdôr Karna Sztudérów Kaszëbów
ò tim mionie założonégò przed wòjną na warszawsczim ùniwersytece
bez Karola Krefta, mieszkeńca gminë Żukòwò, legendarnégò ë tragednégò
dzejôrza kaszëbsczi rësznotë. Dzysdniowô „Cassubia” przejãła
króm miona téż stanicã przedwòjnowégò Karna, jakô òsta ùroczësto
wniosłô na zéńdzenié, a ùczãstnicë zéńdzeniégò przëwitelë ją
himnã Zemia rodnô.
Przédnicë dwùch karnów sztudérów: Lucyna Réter (z „Tatczëznë”
ze Słëpska) ë Krësztof Kòrda (z „Pòmòranii” ze Gduńska) rzeklë
czile słów drëchòm z Żukòwa ò dzejaniém swòjich karnów ë przërôczëlë
nową grëpã do wespółrobòtë. Przédniczka môlowégò żukòwsczégò
partu K-PZ, Kristina Rogalewskô żëczëła młodim brzadnégò dzejaniô
dlô kaszëbiznë, a w tim dzejaniém wiele zwëczajny redotë ë szpôsu.
Przédniczką karna òsta Magda Bisewskô, a w szeroczim przédnictwie
nalezlë sã téż midzë jinszima Katarzëna ë Jack Fôpka z Chwaszczëna
(sostra ë bracyna znónégò kaszëbsczégò pòétë ë kòmpòzitora,
wiceprzédnika gminë Żukòwò), Ludmiła Gòłąbk (córka tołmôcza
Nowégò Testamańtu na kaszëbsczi jãzëk Eùgeniusza Gòłąbka), a
téż Sylwk Nôgel z Lezna (m.jin. wespółrobòtnik najégò pismiona).
W Rewizëjny Kòmisëji nalôzł swój môl Witk Szmidtke z Pãpòwa,
jeden z nômłodszich radnëch gminë Żukòwò.
W planach karna je m.jin. dzejanié samòùczbòwé, zôchãcba do
sztôłceniô sã kaszëbsczi młodzeznë ë ji dzejaniô w żëcym gminë,
wspiarcé przërëchtowaniô kaszëbsczich mszów, rëchtowanié kùlturowëch
wëdarzeniôw, taczich jak spektôklë amatorsczich téatrów, kòncértë
etc, a téż òrganizowanié pòspólnëch Andrzejków czë Wilëji.
Nôleżnicë karna ùchwôlëlë, że jãzëkã zéńdzeniów mdze kaszëbsczi,
a fòrmalno mdą dzejac przë parce K-PZ w Baninie.
tekstë ë òdjimczi P. Bréza
zaczątk |
|
| 
|
Magda Bisewskô (23 l.)
pierszô, mòżna rzec historicznô, przédniczka Karna
òsta welowónô 30 głosama na 37 mòżlëwëch. Mieszkô w Miszewie,
robi w żùkòwsczim Ùrzãdze Gardu ë Gminë ë równoczasno zaòczno
sztudérëje pedagògikã w Słëpskù.
|
|
