Dzéń 2 łżëkwiata 2005 rokù ju przeszedł do historië Kaszëbów,
Pòlsczi a swiata. Wiôldżi dzéń òdéńscô do wiecznoscë òsoblëwégò
Człowieka, Papiéża – Pòlôcha, apartnégò Nastãpcë Swiãtégò
Piotra, jaczi prawie 27 lat czerowôł Katolëcczim Kòscołã.
W pamiãcë lëdzy ë jejich sercach òstónie téż wiôldżi tidzéń
midzë 2 a 8 łżëkwiata, nazywóny przez niechtërnëch òglowima
rekòlekcjama abò òstatną pielgrzimką Papiéża do Òjczëznë.
Jan Paweł II w swòjim testameńce prosył wiernëch ò mòdlëtwã
ë msze swiãté w Jegò jintencjë. W tim czasu wnetka całi swiat
realizowôł òstatną wòlã najégò Papiéża. Na Kaszëbach centralnym
pąktã mòdlëtwów bëła Pùstô Noc w Swiónowie. Pôrã tësãcy lëdzy
z wszëtczich strón Kaszub zjachało 7 łżëkwiata do Matczi Bòsczi
Królewi Kaszub, bë òddac òstatny ùczestnienié ë pòdzãkòwac
za wszëtkò, co zrobił dlô Kaszëbów Òjc Swiãti. Ùroczëstoscë
zaczãłë sã mszą swiãtą, jaką òdprawiôł ks. prof. Jan Perszon.
Swiónowsczi kòscół nie pòmiescył wszëtczich przëtomnëch, wiele
lëdzy stojało na placu przed kòscołã, gdze mòglë na wiôldżim
telebimie òbzérac to, co sã dzało bënë. Mòdlëtwë, na przemión
z pùstonocnyma spiéwama ë przëbôcziwónyma wëstąpieniama Papiéża
do Kaszëbów dérowałë jaż do północë. Ale we wszëtczich gardach
pòbòżni Kaszëbi, nôpiérwi spòntaniczno, pózni ju përznã zorganizowóny
zanoszëlë mòdłë, a spiéwalë ùlubioné piesnie Jana Pawła II.
W kòżdim kòscele, kaplëcë ksãża òdprôwialë msze swiãté, ò
21.00 jasnogórsczé apele, a wierny bez całe dnie mòglë czuwac
przed Nôswiãtszim Sakrameńtã. Radny gminny a pòwiatowi ùtczëlë
ną Wiôlgą Personã nadzwëkòwima sesjama. Dzecë a młodzëzna
w szkòłach, mòże pierszi rôz tak pòwôżno pòdeszlë do szkòlnëch
apelów, pòswiãconëch Òjcu Swiãtémù. Szkólny przeprowôdzalë
ùczbë ò żëcym Jana Pawła II, rëchtowalë gazetczi na kòridorach,
kòżdégò dnia minutą cëszë przebôcziwalë ò tim co sã stało.
Chcemë le przëbôczëc, co dzało sã w tim czasu w przédnëch
kaszëbsczich gardach:
w Chònicach, Gduńskù, Kartuzach, Kòscérznie, Pelplënie, Srôkòjcach,
Wejrowie ë Wiôldżi Wsë.
Le ò tim ju w drëkòwôny Kaszëbsczi Òdrodze.
zôczątk |