P.Bréza
Jakno, że Ustôw ò nôrodnëch ë etnicznëch miészëznach a regionalnëm
jãzëkù mô wnet kriticzné znaczenié dlô, mómë nôdzejã, nié
leno zachòwaniô, ale ë rozwicô kaszëbiznë, temù na téma bãdzë
baro czãsto przëtomnô na starnach najégò cządnika. Je wiedzec,
że sóm Ùstôw nie mdze wiele wôrt, czej kaszëbsczé ùrzãdë nie
wprowadzą gò do codniowi prakticzi. Ë prawie ò tim, co sã
terô robi, żebë Ùstôw nie òstôł leno skrôwkã papióru– chcëmë
pisac.
Tak jak przë rëchtowanim Ùstawù w pòlsczim Sejmie, tak ë terôzka
przédny cãżôr kòòrdinowaniô wprowadzaniô Ùstawù mô na se wzãté
Kaszëbskò - Pòmòrsczé Zrzëszenié. Òstało zrëchtowóné robòtné
zéńdzenié dzejôrzów K-PZ z òbeńdów, gdze zgòdno z rezultatã
Òglowégò Spisënkù kaszëbizna sã trzimô nômòcni ë gdze Ùstôw
mòże wchôdac w żëcé.
Òb czas nëgò pòtkaniô bëłë diskùtowóné prakticzné drobnotë
Ùstawù, ale przédny przëcësk béł kładłi na pòtrzebnotã dalszi
robòtë westrzód dzejôrzów samòrządë ë, przede wszëtczim, westrzód
samëch Kaszëbów, żebë pò latach wënëkiwaniô kaszëbiznë z pùblicznégò
żëcégò zmienic pòzdrzatk na nają rodnô mòwã. Bò wej prôwdą
je, że terô, pò dzesãcylatach diskreditowaniégò kaszëbiznë
wiela najim domôkòm je cãżkò zrozmiec co sã dzysdnia dzeje.
Je czëc głosë czësto zagùbionëch lëdzy, chtërny w szkòle bëlë
biti za brëkòwónié kaszëbsczi gôdczi, a terô ta mòwa mô bëc
w ùrzãdze.
Bëłë téż ë głosë ò òptimisticznym zwãkù. Tadeusz Bigùs ze
Srôkòjc miôł rzekłé, że na zéńdzeniach Radë jich gminë kaszëbsczi
wiedno béł pierszim jãzëkã kòmùnikacëji ë terô tak flot jak
to bãdze mòżlëwé, chcą nają mòwã, zgòdno z Ùstawã, zalegalizowac.
Planë Zrzëszeniégò òbjimają téż pòtkanié przédnictwa gminów
z przedstôwcama pòlsczégò Ministerstwa Bënowëch Sprawów a
Administracëji ë Pòmòrsczégò Wòjewódzczégò Ùrzãdë, gdze bãdze
leżnosc diskùtowaniô ò drobnotach rozpòrządzeniów sparłãczonëch
z Ustawã ë jegò prakticznym brëkòwaniém.
Òb czas pòsobnégò zéńdzeniô, jaczé bëło w Starbieninie z leżnotë
15. roczëznë wprowadzeniégò gminnégò samòrządë w Pòlsce, K-PZ
wrãcziwało przedstôwcóm kaszëbsczich samòrzãdów fertichné
ju aplikacëje do Ministerstwa Bënowëch Sprawów a Administracëji
ò wprowadzenié dwajãzekòwëch tôflów ë pòmòcniczégò jãzëka.
Wôżnym elemeńtã Ùstawù je téż mòżlëwòta dostaniégò dëtków
na dzejnotã sczërowóną na rozwice kaszëbsczégò jãzëka. K-PZ
mô wësłóné pismiona do wszëtczich gminów na Kaszëbach ë też
jinsitucëji, chterné sã zajimają kaszëbską kùlturą, jaczé
projektë bë chcëlë zjiscëc przë wspiarcym finansowëch strzodków
z Ministerstwa w 2006 rokù, bò takô je to czasowô perspektiwa.
Na spòdlim nëch jinformacëjów Ministerstwò chce wiedzec, jaczi
mùszi planowac bùdżet na tã dzejnotã
Jak mô nama rzekłé Łukôsz Grzãdzëcczi z K-P Z je w ti òrganizacëji
swiąda, że latos sã jesz nie ùdô prakticzno zwënegòwać Ùstawù,
ale mô nôdzejã, że na zaczątkù przińdnégò 2006 r. 10 -12 gminów
mdze ju miało złożoné aplikacëje ò dwajãzëkòwé tôfle. A pòzni,
mòże nie tak zarô, ale pòmalinkù przëmiôr nëch gminôw dô to,
że w perspektiwie 10-20 lat wszëtczi kaszëbsczé gminë mdą
miec taczé tôfle.
zôczątk |