Ò tim, jak pòwstôł Wiôldżi Wóz.
Piérwi na swiece, czé jesz drodżi i lasë bëłë zbójcoma zalóné,
jeden fùrmón jezdzył z mlékã do miasta. Wszëscë sã dzëwilë,
że òn je taczi òdwôżni, a òn z te béł baro bùszni. Rôz w karczmie
òn sã miedzë lëdzoma chwôlił, żebë òn chòc nie tëli bez las
ze zbójcoma, ale bez piekło przëjachôł. To dało kòpicã smiéchù.
Fùrmón nic, le zaprzigł kònie i skrącył wòzã pòd piekło. Jedze
i jedze, ju zdaleka widzy pieczelné brómë, pòdcynô kònie i
pòdjéżdzô. Ale cëż? Na zôkrãce zadzôł tilnim kòłã w brómã
piekła. Kòło sã naderwało, a wszëstkò mlékò sã rozlało. Pan
Bóg skôrôł fùrmana za jegò bùchã i na wieczi gò przeniósł
na niebò , żebë lëdze wiedzelë, jak sã Pón Bóg brzidzy bùchą.
Jesz dzys më widzymë jegò wóz na niebie z naderwónim kòłã,
a furmana kòle diszli, jak pòji kònie. Panu Bògù zrobiło sã
żôl te rozlónégò mléka i òn je téż przeniósł na niebò. To
je ta mlécznô droga.
Ksądz i òbsamòtonô
Rôz bëła misjô i na tã misjã przëprowadzëlë lëdze do kòscoła
dzéwczã, a to dzéwczã miôł diôbéł òbsamòtóné. Ksądz sã nad
nim mòdlił chwilã i narôz rzekł: „Diôble, wilez, ale bez szkòdi”.
A diôbéł òdpòwiedzôł: „Jô nie wëlézã”. Té sã ksądz mòdlił
dali nad tim dzéwczëcã i za dobrą chwilã znôw mówił: „Jô ce
mòwiã, diôble, wiléz, ale bez szkòdi”. Té ten diôbeł mù rzekł:
„Të kòłcza ùkrôdł, jô nie wëlézã”. A ksądz rzekł: „Jô téż
ùkrôdł, ale wiléz”! Diôbéł rzekł: „Jô nie wëlézã”. Té ksądz
sã mòdlił dali jesz dobri sztërk, a té znôu na diôbła zawòłôł:
„Diôble, wilez, ale bez szkòdi”. Diôbéł znôw òdpòwiedzôł:
„Jô nie wëlézã” – i zarzucił mù jesz jiné grzéchë. A ksądz
sã do wszésczégò przëznôwôł i mòdlił sã dali, jaż narôz znôu
zawòłôł: „Jô ce mówiã, szatanie, wilez môłim palcã òd rãczi”.
To dało wieldzi rëmòt, a dzéwczã sã stało pòkòrné i rzekło:
„Rozwiążta mie”. I dzéwczã bëło zdrów.
Przërëchtowôł Jôbard
zaczątk |