Jak dalek sygnąc w dzeje swiata, westąpiwałë w pismieniznie
historiczny różné pòzdrzatczi na historiją. Tak sã prawie
skłôdô, że historijô, jako ùczba hùmanistnô, zakłôdô, że je
mòżlëwota corôz to jinszégò jinterpretowaniô tich samëch zdarzeniów.
W tim artiklu, chtërny nie mô bùsznotë, abë gò nazëwac dokôzã
ùczbòwim, chcemë ukôzac rolã Pòmòrzégò w dzejach Pòlsczi wczasnostrzédnowieczny
ë to, w jaczim dzélu bëło òno sparłãczoné z résztą piastowsczi
Pòlsczi. Tekst nen skłôdac sã bãdze z dwóch dzélów; piérszi
òpowiôdô ò czasu òd drëdżi pòłwë X wiekù do 1138 rokù, drëdżi
zôs ò czasu òd 1138 r. do 1308 r.
Chcemë le zaczic mòże òd załóżcë chrzescëjańsczégò państwa
pòlsczégò, Mieszka I. Jako pòdstawa do pòzdrzatkù ò krajowi
przënôleżnocë Pòmòrzégò (ë to nie blós Gduńsczégò) do monarchie
piastowsczi w tim czasu miałë służëc wegróny biôtczi Mieszka
I z Wieletama ë Niemcama. Przejimô sã, że Pòmòrzé przënôlégało
ju wierã do monarchie Mieszka I, z drëdżi jednak stronë przëznôwô
sã, że òpisanié grańców państwa pòlsczégò, jaczi westãpiwô
w dokumence znónym pòd mionã Dagome Iudex (òstół òn westôwióny
przez Mieszka I, jégò drëgą białkã, Òdã, ë sënów: Mieszka
ë Lamberta na pòczątkù lat dzewiãcdzesątëch X wiekù), przedstôwiô
te greńce dosc niejasno. Òglowò przejimô sã jednak, że Pòmòrzé
Zôchòdné òstało sparłãczóné z państwã Mieszka I gdzes w latach
967 – 972, Pòmòrzé Gduńsczi zôs ju przódë do niegò przënôlegało.
Co sã tikô pierszégò króla Pòlsczi, Bòlesława Chrobrégò,
to na zéńdzenim, jaczi òdbëło sã w tesãcznym rokù w Gnieznie
midzë nim a cezerã niemiecczim, Òttonã III, pòwstała diecezëjô
w Kòłobrzégù, co pòcwierdzywô to, że Pòmòrzé przënôlegało,
tedë do Pòlsczi ë zajił je wierã jesz Mieszko I. Jednak nie
òznôczô to, że mieszkańcë ti zemi zjintegrowelë sã z Pòlską.
Chrobri prowôdzôł òstré biôtczi z Miemcama, chtërné to biôtczi
rzeszëłë sã z wiôldżima kòsztama, a nawetka stratama. Wszetkò
to powodowało òpozycëjã procëm Bolesławòwi Chrobrémù westrzód
jégò pòddanëch. Nôleżelë do nich téż Pòmòrzanie. W piérszi
fazë wòjnë Pòmòrzé Zôchòdné zdrzëcëło władzã Pòlsczi ë w 1007
rokù biskùp kòłobrzésczi òstół wënëkóny ze swòji diecezëje.
Co sã tikô Pòmòrzégò Gduńsczégò, to przejimô sã, że ùsamodzelniało
sã òno wzglãdã Pòlsczi kòl 1037 rokù, na co wiôldżi wpłiw
miôł krizis monarchie piastowsczi, jaczi mòżno je dozdrzec
w tim czasu. Jak jô ju przódë spòminôł, wòjnë, prowôdzoné
przez Bòlesława Chrobrégò (a téż przez jegò sëna, Mieszka
II) wiele kòsztowałë jich pòddanëch. Wësoczi bëłë kòsztë ùtrzimaniô
ksyżëcznégò (a przez jaczis czas królewsczégò) dwòru ë wòjska.
Także ë wiara katolëckô nie stała sã tedë pòpùlarnô midzë
lëdzama. Stało sã to midzë jinyma za sprawą tégò, że bëła
òna wprowôdzonô prôwdzewie strzednowiécznyma metodama, taczima
jak na przikłôd wëbijanié zãbów za nieprzestrzéganié pòstu.
Wszëtkò to sprawiło, że wëbùchł bùńt sparłãczony z nôwrotã
do pògańsczi wiarë. Òd państwa pòlsczégò òdłączałë sã taczé
jégò dzéle, jak Mazowsze, Pòmòrzé Gduńsczi ë zajãti przez
Czechów Szląsk. Pózni, Kazmiérz Òdnowicel przełącził te zemie
(w tim Pòmòrzé Gduńsczi) nazôd do Pòlsczi.
Jednak ta próba sparłãczeniô Pòmòrzégò z Pòlską nie òkaza
sã skutkòwnô. Za czasów nastãpnégò władcë Pòlsczi, Bòlesława
Szczodrégò, Pòmòrzé Gduńsczi jesz rôz òddzelëło sã òd państwa
Piastów, (co stało sã kòl 1065 rokù) ë cesziło sã niezależnotą
jaż do rządów Bòlesława Krzewogãbnégò, chtëren w 1116 rokù
pòdbił je ë przëłącził do Pòlsczi. Wëchôdô z tégò, że zemia
pòmòrskô w drëdżi pòłowie XI ë na pòczątkù XII wiekù bëła
kòl pół wiekù samòbëtnô. Żëczné bëło témù gwësno ùrzidzenié
Bòlesława Szczodrégò w biôtczi z sąsadama ë bënowé sztridë
w sami Pòlsce (np. midzë Bolesławã Szczodrim a biskupã Stanisławã,
midzë Zbigniewã a Bolesławã Krzewogãbnym).
Sóm Bòlesław Krzewogãbny znóny je w dzejach jako nen, chtërnémù
ùdało sã pòdpòrządkòwac całé Pòmòrzé Pòlsce. Za jegò czasów
wcelóné do państwa pòlsczégò òstałë: dzél nadwislańsczi ti
zemi (z Gduńskã) ë ji dzél nadnotecczi (Krajna), chterny òddzelô
Wiôlgą Pòlskã òd Pòmòrzégò Zôpadnégò. Do ti porë wszëtczé
zemie pòłożoné na nordã òd strzédnégò ë dólnégò biégù Notecë
nôleżałë do Pòmòrzanów, pòlsczé zôs zemie rozcygałë sã na
półnié òd ti rzeczi. Òd tegò czasù Krajna òstała òddzelonô
òd Pòmòrzégò ë bëła pùzni dzélã Wiôldżi Pòlsczi.
Co sã zôs tikô zôpadnégò dzéla Pòmòrzégò, to nie òstało òno
wceloné do Pòlsczi, le blós pòdporządkowóné ji jako lenno.
Panowôł nad tą zemią ksyżëc Warcësłôw I, chterny kòle 1122
rokù stôł sã lennikã Bòlesława Krzewogãbnégò.
Ë tak doszlë më do kùńca pierszégò dzéla najich rozwôżaniów.
Cëż z nich wëchôdô? To je widzec z tegò, że Pòmòrzé Zôchòdné
na gwës nie mòże bez uznané za jintegralny dzél Pòlsczi piérszich
Piastów. Nôléżało do ni òd ok. 972 r. do 1007 r. (co dôwô
kòle 35 lôt) ë pózni jako lenno òd 1122 r. A wic do chwilë
smiercë Bòlesława Krzewogãbnégò (1138 r.) Pòmòrzé Zôchòdné
pòdporządkowóné bëło Pòlsce (w różny formie) blós kòle 51
lôt. Za to jaż 115 lôt cesziłó sã niezależnotą. Kąsk jinaczi
wezdrzi sprawa z Pòmòrzém Gduńsczim. Jakbë przëjic, że przënôlégało
òno do państwa Mieszka I ju kòle 960 rokù ë rechòwac jaż do
1138 rokù ti wëchôdô, że w tim czasu Pòmòrzé Gduńsczi bëło
dzélã Pòlsczi przez kòle 117 lôt (ok. 960 – 1037, 1047 - 1065,
1116 - 1138) a wòlnotą cesziło sã blós kòle 61 lôt (1037 –
1047, 1065 – 1116). Wëchôdô z tegò, że wschòdny dzél Pòmòrzégò
béł barżi sparłãczóny z résztą Pòlsczi jak dzél Zôchòdny.
Jednak czéj pòrównô sã pòd tim wzglãdã Pòmòrzé Gduńsczi z
jinima terëczasnyma dzélama państwa, téj widzy sã, że bëło
z tim państwã wiele gòrzi zjintegrowóné jak Mazowsze czë Szląsk,
chtërné to zemie na wiele krotszi òd Pòmòrzégò czas wëapartniałë
sã z głównégò derzénia monarchie piastowsczi. Je widzec z
tégò, że dôwny mieszkeńcë pòmòrsczi zemi nie garnãle sã pòd
władzã Pòlsczi ë ùparto strzeglë swòji apartnotë, co zrésztą
bëło tipòwé dlô tégò cządu, niechãtnégò ùrôbianiu wikszich
państwów a nastôwionégò prawie na ùtrzimanié wòlnotë môłëch
tatczëznów.
Fòrmellów Słôwk
zaczątk
|