| Latos nié
Na Ùniwersytece Gdunsczim ùszłégò rokù, to je wiedzec, pòwstało
pòdiplomòwé sztudium nôuczi szkólnëch kaszëbsczégò, to je
pòdiplomòwô kaszëbistika. Bëło baro wiele chãtnëch, sygnie
rzec, że blós jedna trzecô kandidatów na ne sztudia sã dosta.
Latos tegò ju ni mdze.
Zwëczajné bë bëło, że òd rujana 2001 bë rësził nôslédny rok
kaszëbisticzi. Dejade - pitóné ò to prôcownicë Wedzélu Jãzëkòwò-Historicznégò
ÙG rzeką – Nié, latos ni mdze. - Wszëcë wskôzëją na to, że
nie sygło dëtków.
- To je mòżlëwé, że nôbór òstónie znôu zòrganizowóny na letni
semester, jeżlë do zëmë najdą sã dëtczi, abò wszëtcë chãtny
mdą chcelë zapłacëc 2500zł za semester. - gôdô Jerzi Tréder,
czerownik pòdiplomówczi.
Taczi lëdze, co bë chcelë nawetka zapłacëlë kò są! Sóm znóm
pôrã taczich òsób, jaczé bë chãtno zapłacëłë, le bë pòznac
kaszëbiznã dosc bëlno bë mòc ji ùczëc. Ale chcemë le so to
òd razu rzeknąc: nie wszëtcë są bògati. A czë jaczé priwatné
firmë czë òsobë bë ni mògłë ùfùndowac priwatnëch sztipendiów
dlô młodëch szkólnëch, co bë chcelë na ti pòdiplomòwi kaszëbistice
sztudérowac? Drodżi pòdjimcë, to je dlô Waju plac do pòkôzaniô
wajégò patriotizmù kaszëbsczégò!
A tak jesz przë òrãdze - krótkô téma do mëszleniégò: czë
zabierô sã dëtczi taczémù czerënkòwi sztudiów, co na niegò
jidze trzë razë wicy kandidatów, jak je placów?
A sztudérzë do kaszëbiznë sã rwią
Na Ùniwersytece Gdunsczim òd wielu lat òdbiwają sã zajãca
z kaszëbiznë. Namienioné są wszëtczim sztudéróm, jaczi chcą
nôuczëc sã pò kaszëbskù gadac.
Wiedno òrganizowóné bëłë na Wëdzélu Jãzëkòwò-Historicznym
ë prowôdzył je dr Mark Cybùlsczi. Latos òb wëbierczi do Samòrządzënë
Sztudérzczi na Wëdzélu Prawa ë Administracëji jedna z kandidatów
- Małgòrzata Kùrzyńska - rzekła, że mdze mia starã ò wprowadzenié
lechtoratu kaszëbsczégò na nen Wëdzél. We wëlacëjach òna dobëła
ë terô ju je nôleżniczka Samòrządzënë. Co z tegò wińdze zanôleżi
przede wszëtczim òd Dzekana. Sztudérów chãtnëch do nôuczi
je wiele òsób z òbù czerënków: ze Prawa ë z pierszégò rokù
Administracëji.
zaczątk |
