Ò czerwònobestrim celëcu
Żił rôz król z królewą. Mielë òni dzéwczątkò, chtërno baro
kòchelë. Na jech szczescé ni mògła wzerac czarownica. Jednégò
dnia, czej no dzéwczątkò zabôwiało sã samò w ògrodze, przëleca
na czarownica i gò wëkradła i zaniosła dalek, dalek na jedne
pùstczi, dze nie bëło niżódnëch lëdzy i òstawia gò samò na
zéloné lące. Z piersza dzéwczątkò mòckò płakało, ale z czasã
sã przënałożëło, ùbùdowało so bùdinôszk ze sana i tam mieszkało.
Czié òno na té łące tak chòdzëło i szukało sobie cos do zjedzeniô,
té òno pòtkało czarwònobestré celã. Òno mù sã barzëczkò ùceszëło
i sã zaczãło z nim zabawiac. No celã sã do niegò téż łasëło
i sã tak przëwiązało jak człowiek do człowieka, skôkało przed
nim, spało w sanie razã kòle ne dzéwczątka. Témù dzéwczątkù
zdôwało sã czasã, że to celã mô taczi rozëm jak człowiek.
I tak òni żëlë pôrã lat jaż to dzéwczątkò wërosło na spòsobną
pannã.
W nëch stronach bëło wieczné lato. Wieczno kwitłë kwiatë,
wieczno rósł swiéżi brzôd. Rôz no dzéwczã szło samò na òrzechë
i zabłądzëło. I naszła gò noc, jasnô miesądzewô noc. Té òno
sã pòłożëło pòd górą i ùsnãło. Narôzka zbùdził gò w nocë wiôldżi
szôł i w tim ùsadła na tã górã czarownica na miotle. Za sztërk
przëleca znôw jedna, za sztërk jesz jedna, jaż jech bëło trzëdwadzesce.
Té òne wszësczé zaczãłë sã przechadzac pò górze i wëzerac
za diôblą cotką, królewą czarowniców. W nim zerwôł sã znôw
wiater, sto razi wiãkszi jak czié ne jiné czarownice przëjachałë.
Té to przëleca na królewô z berłã w rãce i kòriną na głowie.
Czej òna sadła na trónie i spita sã: „Jesta wa wszëtczé”?
„Jo” òdpòwiedzałë czarownice. A té miotłë, na jaczich òne
przëjachałë, zamieniłë sã w diôbłów. Ti sedzelë na bòkù, pôlëlë
cigarë i żdalë spòkojno, jaż czarownice swój sejm skùńczëłë.
Jedna pò drëdżié, òd nôstarszé do nômłodszé stôwa przed trónã,
kłonia sã niskò diôblé cotce i chwôla sã z tégò, co òna zrobiła.
Kòżdô mia co jinégò. Jedna òczarza króla, co schnął na łóżkù,
a ùmrzec ni mógł. Drëgô zamienia królewsczé dzecë w czôrné
gapë, trzecô młodémù królowi pòmiesza rozëm, że òn rzãdzëc
ni mógł i jegò królestwò ùpadło i tak dalé i tak dalé... A
jedna rzekła: „Zamienia jem naszémù królowi sëna w czerwònobestré
celã i przëwiozła gòm tu na łączi, dze sã pase, i nie wié,
że czej bë òn zjôdł òd nëch biôłëch kwiatów, co to roscą w
tim malinczim jezórkù pòd lasã, to bë z niegò celëczô skóra
òpadła i béł bë nazôdkã człowiekã. Ale òn te nie wié i òn
tim celëcã na wiedno òstónie. A jinô rzekła: jô jem téż przëwiozła
tu na łączi jednã córeczkã królewską, chtërnã całi krôj kòchôł.
Òna tu na tëch łąkach żëje i nie wié, że czej bë òna zjadła
òd nëch òrzechów z drzewa, co tu na łësé górze rosce, to òna
bë dosta mòc, żebë sã mògła òbrócëc w łabądza, czej bë òna
sã tą nają smarą nasmarowa i rzekła to, co më. Té bë òna mògła
zalecëc dodóm, ale òna te nie wié i na wieczi tu òstónie.
Té ta pierszô rzekła: Czié bë témù królowi ùgòtowôł arbatë
z mòdrëch kwiatów tu z tëch łąk, té bë òn béł zarô zdrów,
ale taczégò doktora nima, co bë mù to pòwiedzôł. Té dlô nie
retinkù ni ma. A té czôrné gapë – rzekła jinszô – zamieniłë
bë sã nazôd w lëdzi, jakbë òne sã w niedzelã ò pòrénôszk,
czej słuńce wschôdô wëkąpałë w rosé. Ale tégò jim nicht nie
pòwié i òne gapóma òstaną dalé. A to dzéwczątkò cëchò leżało
i słëchało, żebë wszëstkò dobrze czëło i nick nie zabôczëło.
Czej kòżdô czarownica swòje pòwiedza, té sã pòdniosła diôblô
cotka z trónu, ùderza berłã trzë razë ò zemiã, z chtërné zaczãłë
wëchôdac stołë nakrëté miãsã, winã i słodczëzną. Té królewô
zaprosëła diôbłów do stołu. Kòżdi szedł do swòjé czarownicë.
Jedlë i pilë, smielë sã i radzëlë, co bãdą robilë dalé, a
czej sã najedlë, napilë, té królewô znôw ùderza nim berłã
w stół i wszëstkò narôz zdżinãło. Té òna sã pòdniosła, ùderza
berłã w starégò dãba i sã zacza rozlegac mùzika. I wszësce
zaczãlë tańcowac i skôkac jaż do wschòdu słuńca. Czej ju słunôszkò
wschòdzëc chcało, té królewô rozkôza zakùńczëc i rzekła: -
Na drëgą pełniã miesądza zéńdzemë sã na Łësé Górze kòle Gòstomia.
Té sã wszëscë diôbłe òbrócëlë znôw w miotłë. Diôblô cotka
pierszô wzã pùdełkò spòd pôchë, nasmarowa sã smarą, sadła
na miotłã i rzekła: Terô miã nies, mój diôble, wëżé drzewa,
a niżé nieba, bez przeszkòdë do mòjigò pałacu. A té szmërgnã
pùdełkò i òdjacha z wiatrã. Pò nié jiné zrobiłë to samò.
Czej sã ju ùcëszëło, a słunkò ju wzeszło, té sã no dzéwczątkò
pòdniosło ze swégò môla i wëszło na łësą górã. Pòòbrało wszësczé
pùdełka schòwało w swòj fartuszk i té zerwało òrzechów z négò
drzewa, co na czarownica rzekła, i ùdało sã do swégò bùdinôszka.
Czej òno przëszło, té no celã tak skôkało i tak sã ceszëło
i tak beczało z redoscë, że to nie je nikòmù do òpòwiedzeniô.
Terô to dzéwczã ju rozmiało, co to za celã bëło, nick nie
rzekło, le szło do négò jezórka i nazebrało pãk nëch biôłëch
kwiatów i dało némù celëcu zjesc. Bëlno to celã ne kwiatë
zjadło, tak òno głosno zabeczało. Té z niégò spadła celëczô
skóra. Przed dzéwczëcã stanął piãkni młodi parobk, a to béł
królewicz. To dzéwczã sã w nim zarô zakòchało, bò nen królewicz
ju béł dôwno w nié zakòchóni, bò chòc òn béł celëcã i tégò
ni mógł pòwiedzec, to òn lëdzczi rozëm miôł. Té òni sedlë
na trôwã i òna wszëstkò pòwiedza, co w nocë òd tëch czarowniców
czëła. A té pòwiôda mù ò swich królewsczich starszëch, a òn
ò swòjich i swòjim królestwie, chtërno czekô na niégò... A
chòc jim terô bëło dobrze we dwòjeczkò na tëch pùstkach, to
òni równak pòstanowilë jak nôrëchlé zadostac sã dodóm, ale
przërzeklë sobie téż retowac nëch wszëstczich òczarzonëch.
Ùzebrelë dlô nich różnëch kwiatów i zelégò i pòżegnelë sã
z kòżdim placã, dze sã tak długò zabôwialë. Na òstatkù wzãlë
òrzechë, roztłëklë je, zjedlë zôrna i òdrazu zamienilë sã
w piãkné biôłë łabądze. Négã òrzechów wzãlë w miészeczczi
i powieselë sobie na szëjã, żebë mòglë zjesc i nazôdk sã òbrócëc
w lëdzi. Nasmarowelë sã ną smarą, co te czarownice pòcëskałë
i rzeklë: Terô nas, diôbłë, niesta wëżé drzewa, niżé nieba,
bez przeszkòdë tam, dze ma bãdzema chcała. Té òni nôprzódk
lecelë, lecelë i lecelë do négò króla, co to na łóżkù schnął
i ùmrzec ni mógł. Tam sã zamienilë nazôdkã w lëdzi i szlë
do zómkù i rzeklë, że mògą ùretowac króla. Ale służba jech
nie chca wpùscëc, le rzekła: Bëlë jinszi ùczałi, co mù nie
pòmòglë, a wa dwòje młodëch mia bë mù co pòmòc? Ale, czej
òni sã ju tak długò ùpierelë, té jech jednak służba królewskô
wpùscëła. Dzéwczã ùgòtowało arbatë z mòdrëch kwiatów i dało
królowi wëpic. Król zrobił sã zarô grëbi tak jak przedtim,
wstał z łóżka i za zôpłatã chcôł jima dac swòje królestwò,
ale òni te nie przejãlë, le rzeklë, że mùszą jic dalé retowac
jinëch chòrëch ùczarzonëch. Té òni zamienilë sã w łabądze
i lecelë òd jednégò zaczarzonégò do drëdżiégò i wszësczich
ùzdrôwielë, a té lecelë do starszëch te dzéwczãta i sã jima
pòkôzelë. Ni starszi sã mòckò ùceszëlë i chcelë jich zarôzkã
òżenic, ale ti młodi sã na to nie zgòdzëlë. Królewicz lecôł
téż do swòjégò dodóm. Jegò starszi sã téż baro ùceszëlë. Òn
jim pòwiedzôł, chto gò wëbawił. Té król i królewô jachelë
z nim zarô do né królewsczi córczi. Stôri królowie złãczëlë
òba królesztwa do pòspòłu i tëch młodëch òżenilë i wëprawilë
weselé i zaprosëlë wszësczich panów i królów z òkòlégò. Bëło
to taczé weselé, jaczégò nicht nie pamiãtôł. Jô tam prawie
w tëch stronach béł i z cekawòscë szedł jem tak bez kùchniã
zazdrzec, a czej miã kùchôrz tam ùzdrzôł, té òn wzął patelniã
i miã w łeb wërznął, że jô sã jaż tu nalôz i wama tã pòwiôstkã
pòwiedôm
Przërëchtowôł Grzegorz Schramke
zaczątk |