Òstatno wiele gôdô ò tim, że swiatowô séc - Internét rzeszi
lëdzy na całim swiece. Kò prôwda, Òdroda na przëmiôr mô wicy
czëtińców na Internéce (kòl 2 tësaców na miesąc) jak nëch
co czëtają drëkòwóną wersëjã (nakłôd je 750 sztëk). Internét
rzeszi Kaszëbów na emigracëji w Miemcach ë Americe z tima,
co òstalë na zemi òjców, rzeszi téż nas - chtërny òstalë.
Internét prócz pòcztë elektroniczny dôwô mòżlëwòtã zrobieniô
karnów diskùsjowëch. Pòlégô to na tim, że ti chtërny zaredżistrëją
swòje adresë mailowé na serwérze, jaczi òbsłëgùje karno diskùsjowé,
mdą dostôwelë kòrespòndencëjã òd wszëtczëch bëtników karna
ë mdą mòglë wszëtczim sélac kòrespòndencëjã – tak jakbë wszëtcë
bëtnicë karna sedzelë przë jedym stole... A czasã sedzą pò
dwùch stronach òcéanu.
Dzysô na kaszëbskòjãzëkòwim Internéce sa dwa karna diskùsjowé:
jedne doticzącé spòlëznë, drëdżi lëteraturë kaszëbsczi. Żebë
do nëch sã zapisac, sygnie miec kòmpùter przëłączony do Internétu,
gwôsné kònto pòcztë elektroniczny (e-mail) ë zaredżistrowac
sã na włôscëwim serwérze. Wszeldżé jinfòrmacëje jak to zrobic
są na starnie internétowi www.zk-p.pl w òddzélach Karno diskùsjowé
ë Lëteratura.
Kùliż czasu mòże warac, żebë zapisac sã na ne karna? Żebë
założëc kònto pòcztë elektroniczny – sygnie 10 minut, żebë
zaredżistrowac sã na karnach... mòże téż 10. Nie minie pół
gòdzëne, a mdzesz w samim centrze kaszëbsczégò internétu...
Jinszô jinszosc są kaszëbsczé starnë internétowé. Je jich
dosc wiele, do nôwôżniészëch mùszi zarechòwac starnã Kaszëbskò-Pòmòrsczégò
Zrzeszeniô,
starnã www.kaszubia.com
ë z k-p .pl.
Szkòda, że prócz dokazu Żëcé i przigòdë Rémùsa A. Majkòwsczégò,
jaczi je na serwérze Gduńsczégò Ùniwersytetu, ni ma jesz niżódny
kaszëbsczi bibliotéczi internétowi, na jaczi bë mógł nalezc
przënômni nôwôżniészé ë nônowszé tekstë kaszëbsczich pisôrzów
ë pùblëcëstów. Mòże takô starna pòwstónie?
(ws)
zaczątk
|