Òtmikómë nowi cykl artiklów – Szlachama Òdrodë.
Jedzemë tam, gdze mòżesz nalezc najé pismiono ë òpisëjemë
nen môl. Tak chcemë pòpierac ë reklamòwac kaszëbsczé krómë,
gòspòdë, restauracëjë ë jinsze. Jeżle chcesz, wjedzemë téż
ë do ce...
Ùlica Straganiarskô na gdùńsczi stôrówce. Chòc krótkò do
Mòtławë ë do Żurawia, w sëmie niedalek téż (pòrã krziżówków)
do ùlicë Piwny ë Dłëdżi, je tuwò spòkójno ë spiąco. Czëc w
tim dzélu gardu jaczégòs jinszégò dëcha, jakbë z midzëwòjnia,
abò z prusczich czasów.
Z dala je ju widzec szild. Jak sã pòdéńdze blëżi, òbôczi
sã czôrnégò ksãca na taczi sami farwë kòniu. Je téż nôpisône
wiôldżimi lëterama: Tawerna Mestwin. Trzë stãpińe, dosc cãżczé
dzwiérze ë jem ju w wëstrzódkù. Panëje półcemk. Pò trapach
w górã ë wchòdzã do zalë. Z magnétofonu lecy cëchô mùzëka.
Kaszëbskô. Stołë nakrëte òbrësama, na scanach malunczi, w
kątach leżą rzezbë. W wëstrojenim przëwôżewô cemnobrunô farwa.
Pierszé òdczëcé – ùbëtk, cësza, jimpresjonizm, òddichniãce.
Mòże to bez te òbrazë? Gdze leno sã spòjrzi widzec je kaszëbsczé
akcentë – fana, nôlepczi z grifã, haftowóné serwetczi, zbùnczi,
talerze, tasczi. Je henë ze szmakã sparłãczonô dôwnosc z dzysdniowoscą,
kaszëbizna z òglową kùlturą.
Z lewi stronë bar. Niedalek niegò stoji dosc niewësokô, szczupłô,
z widnima włosama, szëkòwnô białka. To Kazimira Zajączkòwskô
– miéwca karczmë. Ùsmiechô sã, doch nie jem tuwò pierszi rôz.
Ji Mestwin (bò chùdzi téż tam bëł Mestwin, leno że pòd jinszim
włscycelã) òstôł òdëmkłi 22 łżëkwiata. Bez te bez mała szesc
miesãcy bëłë w nim pòkôzóne szterë wëstawë malarztwa, jedna
rzezbë. W czerwińcu òdbëła sã premiera szpetôczélu „Jestem
kotem okrutnym pieszczochem” wëkònanô bez Teater Mini Mùzëczny
Pùpil, a w séwnikù kòncert harmòniowy Cezarégò Pôcórka. Bëł
téż w Mestwinie tidzéń żmùdzci. Mòżno bëło tëdë pòsłëchac
mùzyczi ë piosnków, òbezdrzec tuńce ë zjesc cos z nôrodny
kùchni tegò kraju.
Na codzéń jednak robi sã tuwò kaszëbsczé jestkù. Specjalnoscą
są piekłi bùlwë z kwasnym mlékã. Òkróm tegò je mòżno dostac
rëba, szmùrowóné miãso, chléb ze smôlcã, a do picô kawa, arbata,
piwò ë ... kaszëbsczé kòktajle (!) taczé jak Grif, Damroka,
Witosłôw.
Żesma sã przywitalë, ùsedlë. Na zalë ni ma wiele ledzy –
Mestwin, chòc tuńszi òd bez mała wszëtczich jinszich taczich
gduńsczich gòspòdów, nie je jesz òdkrëti. Dlô gòscy je z tegò
jédno dobroctwò – ùbëtk. Zaczinômë gôdac.
Wasta Kazymira mô sniené, abë ji karczma stała sã ògniszczem
artisticznim môłich tatczëznów, nie blós kaszëbsczi (chòc
ta przóde wszëtczim), ale z téż jinszich òbéńdów ë krajów.
Chce, abë bëłë wieczórczi mùziczne, pòeticczé, nawetka teatralne.
Przi tim planëje, abë wëstrój Mestwina jesz barżi dichôł dawnoscą,
a prze tim bëł delikatno sparłãczony z dzysdniowòscą, abë
pasowôł do charakteru karczmë.
Òkróm tegò chce, jak do té pòrë, wënajmòwac zalã na kònferencëje,
wiésela, ë jinszé jimprezë.
Kaszëbskô Tawerna Mestwin, ùl. Straganiarskô
20 –23, 80 – 837 Gduńsk
Włôscëcél – Kazëmira Zajaczkòwskô, tel. (58) 301-78-82, szałertelefón
0-606-74-52-52
Jôbard (G.J.Schramke)
zaczątk |
