W strëmiannikòwim numrze Òdrodë Ł. Grãdzëcczi sã jiscy
ò to, że sejmòwô ùstawa ò mniészëznach nôrodnëch i etnicznëch
nie òbjimnie Kaszëbów. Pisze òn, że „w sejmie kaszëbizna nie
je wôrt òchronë” tak, jak mniészëznë karajimskô, cëgańskô,
tatarskô i łemkòwskô. Chòdzy wierã ò to, że Kaszëbi nie mdą
ùznóny za mniészëznã etniczną, bò są dzélã pòlsczégò nôrodu.
Ł. Grãdzëcczémù bë wierã zanôleżało na tim, żebë Kaszëbóm
òstôł przëznóny òsoblëwi status i przëwileje, taczé jak mają
te, wëżi wëmienioné spòlëznë.
Dotëchczôs Kaszëbi so jakòs radzëlë. Përznã nama w tim pòmòglë
naszi pòliticë - pòsłowie i senatorzë. Ale to nie bëłë jesz
przëwileje, le dopiérkù pierwszi rôz w historii kaszëbizna
dozna òpieczi ze stronë państwa. A przedtim òna bëła le wiedno
tãpionô. Tej takô môłô rekompensata nóm sã nôleża. Ale kò
tak, w całoscë, za wiele më z nëch z „przëwilejów” nie skòrzëstelë.
Mòżlëwé jednak, że pò ùchwôlenim nowi ùstawë grozy nóm to,
że skùńczą sã wszelaczé ùrzãdowé dotacje na Pòmeranią i na
wëdôwk ksążk? A w taczim paskùdnym ùstroju, w jaczim mùszimë
żëc, nie dô sã òbéńc bez „przëwilejów”. Czejbë nôród nie béł
òkrôdóny, tej bë sã nalazło dosc „mecenasów”, wspiérającëch
kaszëbiznã. A tak mùszimë liczëc na łaskã panów.
Na temat òchronë (tj. przëznaniô ùprzëwilejowónégò statusu)
mniészëznów jô ju czedës pisôł, ale nicht tego ni mòże so
wdarzëc, bò mój felietón na ten temat nie ùkôzôł sã w drëkù.
A miôł sã ùkazac w Kurierze Bëtowsczim, le redakcjô tegò cządnika
gò „nie pùscëła”. Tak samò zresztą pòstąpiła redakcjô Òdrodë
z dwùma jinyma mòjima tekstama. Jô rozmiejã, że redakcyjné
karno mô prawò pùblikòwac to, co mù pasëje i nawetka òdrzucac
tekstë, co nie są zgódné z nôdbama przez nie wëznôwónyma.
Le szkòda mie je mòjëch, niewëdrëkòwónëch felietónów. W „swòjim
czasu” òne bëłë jesz dosc swiéżé, aktualné i mògłë kòmùs dac
përznã do mësleniô.
Felietón wësłóny pôrã lat temù do Bëtowsczégò Kùriera béł
napisóny w czasu, czej bëła rozpatriwónô pòdobnô ùstawa ò
mniészëznach. W rezultace ji ùchwôleniô mniészëzna niemieckô
dosta przëwileje wëbòrczé (mniészô lëczba głosów, pòtrzébnô
do te, żebë jich pòséł sã nalôzł w sejmie) i tej do pòlsczégò
sejmù sã dostało karno pòsłów - Niemców. Tak téż je do dzysô.
W tim tam felietónie jô pisôł, że naszim, domôcym pòlitikóm
bë sã widzało, żebë Kaszëbów téż òbjimnąc przëwilejama dlô
mniészëznów etnicznëch. A jô béł i jem zdaniô, że nie je trzeba
niżódnëch przëwilejów dlô niżódnëch mniészëznów. Prawie òpak.
Chòdzy ò to, żebë wszëtcë mielë równé prawa. Żelë mdze sprawiedlëwòsc,
tej so kòżdi radã dô. Przëwileje bùdzą le zôzdrosc nëch lëdzy,
co nie są ùprzëwilejowóny. Dlôte lepi bë bëło, żebë mniészëznë
nôrodné wëkòrzëstałë te prawa, jaczé ju są zapisóné w konstitucji
(je tam wierã zôpis, że wszëtcë są wedle prawa równy...).
Dobrze je, żelë Kaszëbi sã troszczą przede wszëtczim ò se.
Tak pòwinno bëc, człowiek pòwinien nôprzód mëslec ò tim jak
zapewnic chléb i bezpiek swòji rodzëznie.
Wmôwiô sã nama, że më mùszimë kònieczno duńc do Europë, bò
jak nié tej „biada”. Ten tón téż dôwô sã wëczëc téż w Pomeranii.
Czëtiwóm tã optimisticzno nastrojoną Pomeranią. Strzód artiklów
je pisóné përznã na temat „wstãpòwaniô” Pòlsczi do Europë.
Naszi gbùrzë i rëbôcë, pòprzez pùblëcëstów wëpòwiôdają swòje
òbawë, ale nié za òstro. Co lëdze tak pò prôwdze mëszlą ò
tim eurowstãpòwanim?
Jô widzã, że Drëszë z Òdrodë i z Pòmeranii pò prôwdze mają
starã ò kaszëbiznã, że rozmajitima spòsobama próbùją wskrzesëc
kaszëbsczégò dëcha itd. Jednak trzeba so zdac sprawã z tegò,
że przëstąpienié do Unii zniszczi pòlską (i kaszëbską) wies.
Kò ùrzãdnicë z Brukselë gôdają, że pòlskô wies mùszi sã stac
pòdobnô do europejsczi. A tam w rolnictwie je zatrudnionëch
13 procent wszëtczich robòtników. A nawet, czejbë na pòlsczich
wsach, pò wstąpienim do Europë òstało 30 procent lëdzy. Co
tej sã stónie z kaszëbizną? Kò kaszëbizna żëje jesz le na
wsach, a i to słabò. Tej jak mómë nazwac tëch, chtërny nibë
walczą ò kaszëbiznã a radzą przëstãpòwac do Unii?
Żelë chto chce nama wmówic, że ni ma alternatiwë, nie wierzta
(je NAFTA, a nôlepi: bëc samòstójnym). Unia Europejskô je
to „moloch” i wszëtkò w ni funksnérëje corôz to gòrzi. Do
cze sã pchac tam, gdze nas nie chcą? Prôwdac, òni le tak gôdają,
że nas nie chcą. Ale je widzec, że òni na nas mają wiôldżi
aptit i baro chãtno nas do kùńca pòłkną...
Ale tu, żelë jidze ò Kaszëbów i Pòlôchów, chcemë sã zastanowic,
czëjim kòsztã më mómë bëc ùprzëwilejowóny? Żelë më cos dostóniemë
nadto, tej kòmùs trzeba cos ùmknąc. Na szczescé zapòwiôdô
sã, że z tegò kłopòtu nasz sejm nas wëbawi. Òstóniemë wszëtcë
bez „òchronë”. I jô mëszlã, że to sã dobrze skłôdô. Chcemë
le sã trzëmac razã z Pòlôchama!
Eugeniusz Gòłąbk
Redakcëjô nie ùjuwerniô sã z całim pòzdrzatkã
Autora.
zaczątk
|