Rok rocznie, ju òd szterech lat Kaszëbskô Òglowô Licëjô we
Brusach òrganizëje nôukòwé sympòzëje, sparłãczoné z kònkùrsã
dlô strzédnëch szkòłów na nôlepszi nôukòwi dokôz zrzeszony
z ji témą na nen rok. Latosô rozegracëjô szła pòd znanką ùhònorowónëch
przëznôwónym bez Karno Sztudérów Pòmòranijô Medalã Stolëma.
Na kònkurs òsta sélónëch 16 dokôzów.
Simpòzëjô, a przë tim rozstrzëgniãcé kònkùrsu òdbëło sã 28
strëmiannika w brusczi licëji. Pò òtemkniãcym ùroczëznë, pòwitanim
bëtników, a téż przedstawienim kòmisëji – dr Mariana Fridë,
dr Jerzégò Knybë, Jiwònë Mejer (nôleżniczczi przédnictwa KS
„Pòmòranijô”) ë przëbòczenim historiji ti rozegracëji – biôtkùjący
sã ò laùr ùtwórcë nôlepszégò dokazu òbgôdiwalë swòjé robòtë.
Pò jich wëstąpieniach kòmisëjô pòszła na nôradã, a czas pauzë
przed ògłoszenim dobiwców ùcznióm ë gòscóm sympòzëji zajima
pierwi kapela brusczégò Kaszëbsczégò Lëdowégò Karna Krëbane,
a pùzni ùriwkama z Żëcégò i przigòdów Remùsa Aleksandra Majkòwsczégò
szkólny téater, co gò prowôdzy młodô szkólnô kaszëbsczégò
jãzëka Anna Ziółtkòwskô.
Pierszi plac kòmisëjô przëzna Marzenie Krzoska za dokôz Poeta
i pisarz kaszubski Jan Piepka, drëdzi równo Magdalenie Galec
(Julian Rydzkowski) ë dwùm ùtwórczëniom – Joannie Gackòwsczi
ë Mónice Krzoska (Stanisław Janke jako stolem – legendarny
siłacz kaszubski, miotacz głazów), trzëcy téż równo Agnieszce
Werochòwsczi (Felicja Baska Borzyszkowska) ë Aleksandrze Lepak
(Anna Łajming – laureatka Nagrody Stolema).
Kòmisëjô przëzna téż òsoblëwé wëróżnienié. Ùtczony nim òstôł
dokôz Mateùsza Pokrziwińsczégò ë Môrcëna Sałatë z Czerska,
co z pòzdrzatkù na wiek jegò ùtwórców (òbaji są ze spòdlëczny
szkòłë) ni mógł bëc zakwalifikòwóny do kònkùsu. Jich robòta
widzała sã kòmisëji, temù téż tak ùmëslëła ùhònorowac młodëch
ùczałëch.
Wszëtczi dobiwcë òstalë ùtczony nôdgrodami a diplomama, a
ùcznie przëtomny na rozegracëji òstalë òbdarowóny kaszëbsczima
zakłôdkama – dôrënkã wëdowiznë Region.
Òb czas sympòzëji bëło téż mòżno òbezdrzec wëstówk òdjimków
z tereczasnégò dzejanégò KS „Pòmòranijô”.
G.J. Schramke
zaczątk
|