tołmaczënk: Karolëna Sledzewskô
W jómie, w samim westrzódkù jednégò wialdżégò lasa, żił
pùstelnik. Człowiek mądri i tak stôri, że starszégò nie bëło
w całim òkòlim. Òkòma czile nôbarżi pòtrzébnëch statków całé
jegò dobro to béł pies zwóny Szarik, barón Bòdzëk i kòzeł
Wlôzôk. Bëlë to jegò dobri drëchòwie i towarzësze w jegò samòtnoscë.
Wszëtcë troje Szarik, Bòdzëk i Wlôzôk – bëlë baro dobrze znóny
w całi òkòlënie. Szarik miôł baro dobri nos, że w nôblëższich
dwadzesce wsach nie bëło psa z lepszim wãchã.
Bòdzëk znôu béł mòcny, że bëlno nôstarszi lëdze ani nawet
sóm pùstelnik, jaczi béł starszi òd wszëtczich, nie pamiãtelë
môcniészégò òd niegò. Wlôzôk sã tak pòjużno wspinôł pò nôprzitszich
ùrzmach, że mòżesz trzë dni chòdzëc wzdłuż i wszérz przez
no òkòlé a nie nalézesz taczégò kòzła, jaczi bë sã mógł z
nym mierzëc.
Taczi to prawie bëlë drëchòwie stôrégò pùstelnika.
I wszëtcë troje wespół z pùstelnikã żëlë spòkójno i szczestlëwie
w jegò rëmny jómie jaż do czasu, czedë jednégò dnia do jich
lasu skądkas z wialdżégò swiata sprowôdzył sã jeden niebezpieczny
zbójca, jaczi zamieszkôł w jedny bùdze òstałi pò wãglownikach
na drëdżim kùńcu lasu.
Nen rabùsznik rabòwôł gbùrów, jaczi przëchôdelë do lasu scënac
drzewa abò żebë przëniesc stôrémù pùstelnikòwi zjestkù i zapëtac
gò ò jakąs mądrą redã. I jednégò dnia, czej pùstelnik béł
përznã chòri i ùmãczony głodã, leżôł na swòjim łóżkù z sëchëch
lëstów, Szarik, Bòdzëk i Wlôzôk w drëdżim kùńcu jómë ùgôdowelë
sã, co terô jima trzeba robic.
Cha! Terô wiém, co më zrobimë! – zarëczôł chùtkò Szarik –
Le blós pòsłëchôjta mie, czej chceta wiedzec, co bądze ze
zbójcą.
Bëlno, më bądzemë ce słëchac! – zgòdzëlë sã i Bòdzëk i Wlôzôk.
– Të jes nôrozëmniészi midzë nama, të nama mòżesz rozkazëwac.
Czedë noc ju nasta, trzech drëchów pòmale wëlazło z jómë i
szło przez las. Czedë òni òdeszlë dali òd jómë, Szarik w jednym
placu zatrzimôł sã, cknął wkół i rzekł:
Mój nos gôdô mie, że tątka przed trzema gòdzënama przelôżôł
zbójca i niósł ùszlachtowóné gùlã. Pòjmë za nim!
I wszëtcë troje szlë przez mroch pò zbójcowëch szlachach,
a prowadzył jich Szarik wąchającë ùwôżno przed sobą.
Pò dłudżim jidzenim trzeji drëchòwie w kùńcu wëszlë na jeden
môłi smùżk, dze bëła zbójowô bùda. Pòdkredlë sã do ni, schòwelë
za scaną z ti stronë, dze nie bëło òkna. Szarik dwignął głowã
i zaczął cknąc pôchã, jakô dochôdała z bùdë.
Mój nos gôdô, że bënë piecze sã gùlã a zbójca spi kòle piécka
z òtemkłą gãbą. I tej zaczał szëkòwac ùdbã ataczi.
Të, Wlôzôkù, wëlézesz na dak bùdë i zaczniesz skakac i tłuc
sã do czasu, jaż zbójca sã nie zbùdzy i nie wińdze bùten,
żebë ùzdrzéc, co sã dzeje na dakù. A czedë òn bãdze bùten,
të, Bòdzëkù, wënëkôsz zeza bùdë i grzimniesz gò w plecë tak
mòcno, że òn stracy jaką le chãc, żebë dali òstac w tim lasu.
I dëcht le prawie Szarik rzekł, ju wiesołi Wlôzôk zjawił sã
na dakù zbójcowi bùdë i zaczął tak skakac i tuńcowac, że do
bëna zbójcowi gãbë zaczã sã sëpac szôdzô, a w całi bùdze rozlégôł
sã trzôsk, czéjbë na górze same diôbłë skôkałë i walëłë swòjima
kòpëtama. Zbójca, ùrzasłi, òdeckł ze spikù i jesz zaspóny
chwôcył barnią i pòspiôł sã bùten, ale czedë dozdrzôł w mrochù
dzywnégò stwòra z wialdżima rogama, jaczi tuńcowôł na jegò
dakù, sã zmòkł z ùrzasù.
Diôbeł! – zakrzikł gùsłowati zbójca i wëpùscył barnią z rãczi.
I czej le zaczął sã òbzerac wkół, mëszlącë dze ùcekac, tej
zeza scanë wënëkôł Bòdzëk i biegnącë grzimnął gò tak mòcno
pò chrzepce, że zbójca òdlecôł dzesãc métrów i dëcht le kùlącë
sã zatrzimôł na samim kùńcu lasa.
Chau, chau! Terô mómë ju z tobą kùńc! – pòdbiégł do niegò
Szarik i drénëjąco załajôł mù w samò ùchò tak, że to bëło,
jakbë lew zarëczôł. Zbójca skòcził, zaczął biegac chùtkò przez
las tak, że ùnosza sã za nim całô blóna sëchëch lëstów, a
bëło to tak, jakbë dął wiater. Za nim głosno smielë sã Szarik,
Wlôzôk i Bòdzëk.
Ten zbójca, nipòcejc ju szedł,
Zdżinął, że ani prąg nie zbiégł.
A terô pòjta lëdze tu
Mòżeta przez las chadac ju!
Ni môta czegò ju sã bac
Ters më tu mdzemë królowac!
Długò sã tak redowelë, tuńcejącë i przecywiajiącë sã, do
czasu, jaż nie ùgnietlë całã trôwã na smùżkù. Tedë przewrócëlë
zbójcową bùdã i ùceszony szlë nazôd, żebë òdkazac starcowi
ò wiesołi nowinie. Z przódkù szlë Szarik i Wlôzôk szczestlëwie,
spiéwającë jaką stôrą i długą spiéwkã, jaczi naucził jich
pùstelnik. A za nima tipkającë i pòdskakùjącë z nodżi na nogã
szedł Bòdzëk. Òn niósł na jednym rogù piekłé gùlã a na drëdżim
sztëk chleba, jaczi rëchli wzął ze zbójcowi bùdë, bë dac to
starcowi.
I òd te czasu w lese znôù przëszedł nazôd stôri mir. Gbùrowie
pòjużno przëchôdelë, rãbilë drzewa, przënosëlë pùstelnikòwi
zjestkù, słëchelë jegò mądré redë i wszëtcë zgódno chwôlëlë
naszich trzech dzyrżców, Szarik, Bòdzëka i Wlôzôka, jaczi
wëbawilë las òd zbójcë i nieùbëtkù.
zaczątk
|