Pauel Kąsk-Szczëpta
Sejm mô ùchwôloné ùstôw ò miészëznach ë jãzëkù
regionalnym. Mają sã w nym nalazłé taczi zapisënczi, jaczé
skùteczno blokùją kaszëbiznã.
Ùstôw ò miészëznach nôrodnëch, etnicznëch ë regionalnym jãzëkù
je to akt, jaczi regùlëje wszelczé prawa sparłãczoné z sytuacëją
miészëznów ë ùżëwanim môłëch jãzëków w pùblicznym żëcym. –
Na nen akt më żdómë òd 1991 r. – je czëc we zrzeszeniowëch
karnach. W 91. wëszedł pòslédny ùstôw, jaczi reglowôł ne sprawë,
a Kaszëbów miôł za miészëznã (grëpã) etniczną. Wszëtcë bëlë
dosc zgòdny, że nie béł doskònałi – stądka ùdba nowégò. Do
negò bëło czile aktów wëkònawczich, na pòspòdlim jaczich kaszëbsczi
je do dzysodnia ùczony we szkòłach. Wedle donenczasnëch przepisów
kaszëbsczi mógł bëc ùczony we szkòłach, równak nie bëło mòżlëwòtë
ùżëwaniégò gò w pùblëcznym żëcym – przed sądã czë w ùrzãdze.
Stôwianié tzw. „witôczów” w dwùch jãzëkach na greńcach pòwiôtów,
nie pòdlégało pòd niégò. Dosebno – dwajãzëkòwé miona szasëjów,
jaczé nalézemë na przemiôr w òkòlim Miechùcëna ë Mirochòwa,
Òstrzëcach czë Jastarnie – bëłë w kòmpetencëji gminë.
Kaszëbi bëlë ùznóny za miészëznã – grëpã etniczną. W zestôwienim
z europejsczim prawã pòjawił sã tôczel, bò wedle eurorechtu
ni ma czegòs taczégò. Nen pòchwat – „etniczny” – je znóny
anielsczi nôuce ë anielsczémù prawù, nié kòntinentalnémù.
Na kònticence, w brukselsczich regùlacëjach – w ùproszczenim
– są miészëznë nôrodné a jãzëczi regionalné. Za nôrodną miészëznã
są bróné téż nôrodë, co ni mają swòjégò państwa. Na przëmiôr
Katalanowie ë Baskòwie w Szpańsce czë Ladinowie ë Sardińczicë
w Jitaliji. Jiszną sprawą są jãzëczi regionalné, jaczich pò
prôwdze je mało. Blisczim nama jich przedstôwcã je – znóny
starszim Kaszëbóm – dolnoniemiecczi (plattdeutsch). Prawa
jãzëków regionalnëch są miészé. Naji dzejôrze – mést swiądno,
bò drãgò jich pòdezdrzewac ò brak łączbë z jawernotą – nie
chcelë, bë Kaszëbi bëlë miészëzną nôrodną. Na ten ôrt òdcelë
nama wszëtczima zacht dzél prawów ë dëtków. Blós temù, że
chcelë dokazac, że Kaszëbi są barżi pòlsczi jak Pòlôszë…
Ùdba nowégò ùstawù, jakô zagwësniwa prawa miészëznów – grëpów
etnicznëch a téż nôrodnëch, w kùńcu trafiła do sejmù. Dodôjmë,
że Kaszëbi w nym òstelë ùznóny za jedurny w Pòlsce jãzëk regionalny,
a w prawach nen òstôł zrównóny z etnicznyma grëpama. Nen dôwôł
prawò do dwajãzëkòwëch ùrzãdników, gwarantowôł téż òsoblëwi
dëtkòwi dodôwk dlô ùrzãdnika, co znaje kaszëbsczi. To samò
mia tikac ùrzãdowëch pismów a téż sądów. Òsta ùtrzemónô kaszëbizna
we szkòle a wprowôdzoné prawò do dwajãzëkòwëch tôflów z mionama
gardów, wsów a szasëjów. To sã zdôwa, że wnetka wszëtczé pòstulatë,
żelë jidze ò kùlturalną autonomiją – mdą spełnioné, ùjawernioné,
zagwësnioné.
Przed ùchwôlenim ùstawù mia môl baro dzywnô jigra midzë lewicą
a prawicą. Skrajné partë (LPR, Samòòbróna) bëłë procëm taczémù
reglowaniémù prawów miészëznów, jaczi bë dôwałë miészëznóm
jaczé le prawa. Lewica – tak jak wiedno lewica – bëła za tim,
żebë ne sprawë ùreglowac ë dac miészëznóm wszelczé pòtrzébné
prawa. Baro nietipiczno mają le sã zachòwóné liberalë. Ny,
co wiedno dzejelë wedle regla, że państwò mô jak nômni wchadac
w sprawë òbiwatelów ë dawac jak nôwicy prawów, òpòwiedzelë
sã procëm. Nen center, donądka prokaszëbsczi center – to je
Òbiwatelskô Platfórma, zrobił cos, czegò nicht sã nie spòdzôł.
Na tidzéń przed głosowanim ùstawù pòsélc Kazëmiérz Plocke
z pùcczégò krézu (nôleżnik K-PZ) w miono swòjégò partu ògłosył,
że nen nie wesprze ùstawù, żlë mdą w nim zapisënczi ò dëbeltowëch
tôflach z mionama wsów a gardów, a téż dwajãzëkòwëch ùrzãdnikach.
Nié dérało długò, a dzél kaszëbsczich strzodowiszczów miôł
zareagòwóné. Na zetkaniach z wëlownikama na Nordowëch Kaszëbach
czile dniów pózni pòsélc Plotzke ë senatór Donald Tusk (téż
Kaszëba ë nôleżnik K-PZ) barnilë sã przed głosama kriticzi.
Òstało jima zarzëconé m.jn., że nie stoją za kaszëbizną. W
Pùckù Tusk miôł rzekłé, że Platfórmie szło ò danié przékù
Niemcóm ë niedopùszczenié do niemiecczich nôdpisënków na Szląskù.
W kùńcu pòd napòrã kriticzi ùsôdł, a rzekł do pòsélca Plotzke:
Kazimiérz, barni sã sóm!
Czile dniów pózni Karno Sztudérów Pòmòranijô mia napisóné
do przédnika Kaszëbskò-Pòmòrsczégò Zrzeszeniégò ò pòstawienié
pòsélca Plotzke przed kòleżeńsczim sądã ny stowôrë. Jak Òdroda
sã dowiedza z nieòficjalnëch wiadłów – pòsélc przed ną kòlegiją
nie stónie nigdë. Midzë jinszima temù, że nôleżnicë Pòmòranije
stracelë pòdskôcënk do cygnieniô ny sprawë. Téż bez to, żebë
nie zaògniac sytuacëje we Zrzeszenim. Mòże to przed wëlowanim
nowëch samòrządowëch władzów?
Ùstôw òstôł ùchwôlony. W tereczasnym sztôłce – kaszëbiznë
(jak ë wszëtczich jinszich môłëch jãzëków) je mòżno ùżëwac
pùbliczno blós w nëch gminach, w jaczich je nie mni jak 50
proc. nôleżników negò nôrodu. Niechtërné sprawë mają bëc rozstrzëgóné
w referendach. Letkò rzec – we wiele kaszëbsczich gminach
kò je wicy jak pòłwa Kaszëbów. Jo? Ale tak pò prôwdze – w
jaczi gminie tëli na òglowim spisënkù tak miało wpisóné? Lëdze
sromelë sã abò ni mòglë pòdac kaszëbsczi nôrodnoscë ë jãzëka.
Terôzka bez to je zôgróżba, że – czej w niżódny kaszëbsczi
gminie ni ma dosc Kaszëbów – nigdze nie mdze mòżno ùżëwac
rodny mòwë!
Dzyw bierze na reakcëje dzéla dzejôrzów Kaszëbskò-Pòmòrsczégò
Zrzeszeniégò pò ùchwôlenim. Na przëmiôr Kazëmiérz Kléna, bëti
senatór z Łebë, miôł rzekłé w Kartuzach òb czas kaszëbsczégò
diktanda, że ùstôw òdpòwiôdô temù, za czim më żdelë. To równak
nie jedurny pòzdrzatk. Z drëdżi stronë Brunon Sënôk, òdchôdający
w gòdnikù przédnik ny stowôrë, miôł zato rzekłé Radiu Gduńsk,
że ùstôw je tim barżi lëchi, że spòdlim do rechòwaniô procentów
miészëznë mdze òglowi spisënk, jaczi „òstôł skòpóny”. Przëbôczmë,
nen òb czas òglowégò spisënkù protestowôł procëm zôchãcaniémù
do pòdawaniô kaszëbsczi nôrodnoscë a téż òglowòkaszëbsczi
akcëji rozwôżaniô pò całëch Kaszëbach jinfòrmacyjnëch ùlotków
ò spisënkù.
Równak nié wszëtkò straconé. Ùstôw mòże jesz sã zmienic.
Jedurnô nôdzeja w Senace, w jaczim lewica mô wikszëznã a prezydence,
jaczi je téż lewicowi. Na zberkù – szpòrt: czë Kaszëbi, czej
mają dozdrzóné, że to nié prawica le lewica barni jinteresów
kaszëbiznë, mdą jã wëlowac w nôblëższim wëlowanim? Kùńc kùńców
je téż baro mòżlëwé, że – jak mô rzekłé Bruno Sënôk w rozmòwie
z Radiã Gduńsk – Kaszëbi zareagùją na ten ùstôw tak samò jak
na nen ò zakôzënkù tobaczi…
zaczątk |