Jô sã ùrodzył 9. zélnika 1902 rokù
w Mirochòwie. Pò to jô przëszedł na swiat, żebë prôwdã głosëc
Kaszëbóm ë ò Kaszëbach ë dlô jejich dobra robic ë dzejac wedle
swòji mòżnoscë zgòdno z sëmienim. Je to dosc òdpòwiedzalné
i baro òdwôżné widzenié swòjégò bëcô, tu na zemi, westrzód
lëdzy, nié wiedno pòzytiwno nastawionëch a czãsto zwiartich.
Aleksander Labùda widzôł, że mô do spôłnieniô swòjégò szlachù
misëją, misëją retaniô kaszëbiznë, chtërny òfiarowôł całé
swòjé żëcé.
Swòjã edukacëją zaczinôł òd katolëtcczi szkòłë
lëdowi w Mirochòwie. Bëła to miemieckô spòdlëcznô szkòła,
w jaczi bëło gôdóné le pò miemieckù. Doma ùżëwóny béł blós
kaszëbsczi a w kòscele, na ùczbie do Swiãti Kòmóniji - pòlsczi.
W czasu ùczbòwëch wësôdzków, dzecë gôdałë gwësno pò kaszëbskù.
Bëło to wnenczas tãpioné. W tim dëcht czasu, jak gôdô sóm
Labùda, pierszi rôz stanął òdemkło w òbarnie rodny mòwë. Przékòwôł
sã zakôzowi ùżëwaniô jãzëka kaszëbsczégò we szkòlë, dokôzëjącë
to tim, że je to rodnô mòwa, chtërną mô miłowac ë tczëc. Taczé
bëłë zôczątczi dardżi kaszëbsczi Aleksandra Labùdë.
Pùzni, pò 1918r, jakò ùcznia Państwòwi Szkólnowsczi Seminarëji
w Kòscérznie, miôł leżnosc pòznac ks.dr Léòna Heykã, znónégò
lëterata i pòétã kaszëbsczégò, jaczi béł jegò katechétą. Miôł
òn wiôldżi wzątk na sztaturzenié sa młodégò Labùdë, przede
wszëtczim na jegò zacekawienié sa témizną kaszëbską. Òb czas
ùczbë sztudérowôł téż zsziwki Grifa, òbeznôwôł sa m.jn. z
dokôzama Młodokaszëbów, z drëkama Ceynowy, Lorentza. Dzãka
temù òdeckło sã w nim czëcé dëchòwi zdrëszeniô ze swòją tatczëzną.
Maturã zdôł 15 lëpińca 1923r. ë òd raza dostôł òbsadzenié
na szkòlnegò i p.ò. prowôdnika spòdlëczny szkòłë w Lënii.
Robiôł tam do 1928r. Pòtkanié razã z drëchem Janem Trepczykiem
kòl dr Aleksandra Majkòwsczégò w 1925r. bëło przełómanim w
żëcym młodégò Labùdë. Wszëtczé wątplëwòscë co do pòzdrzatkù
pòszłë wek. Pëtającë sã ò to czë Kaszëbi są apartnym nôrodã
słowiańsczim, czy blós „szczepã” pòlsczim, czy mòwa Kaszëbów
je apartnym jazëkã słowiańsczim, czy blós gôdką pòlską, Majkòwsczi
òdpòwiédzôł: „czëtôjce”, pòkôzëjącë na słowôrz Stefana Ramùłta:
„Słowôrz jãzëka pòmòrsczégò, abò kaszëbsczégò”, Akademijô
Mésternoscë w Krakòwie.
„Szczestlëwi je człowiek, jaczi pò dłudżich pòszukòwaniach
nalôzł to, co szukôł. Jô szukôł ë nalôzł zgrôw mòjégò żëcô,
ale równoczasno òpatrznosc nałożëła na mie grãdą robòtã ë
òbrzészczi. Temù naléżało dzejac, cos robic. Leno jak i òd
czégò zaczic?” Razã z Janã Trepczikã ùmëslëlë założëc Zrzeszenié
Szkólnëch Kaszëbów. Zjôzd w Kartëzach w 1929r, nimò tôklów
z starnë wëszëznë, sã òdbéł. Na zjôzd przëjechôł m.jn. Majkòwsczi,
jaczi zabédowôł òbsadzenié kaszëbsczi òrganizacëji dlô wszëtczich
lëgòtnëch Kaszëbów, nié le dlô szkôlnëch Kaszëbów. Pòmëslënk
tén òstôł przëjati przez aklamacëją. Pòwòłónô wic do żëcô
Zrzeszenié Krajewé Kaszëbów, pierszą òrganizacëją skòscérzającą
Kaszëbów. Rok pùzni Labùda sã zwòlnił z zôrôbkù szkólnégò.
Gwësny ju swëch mësli ë dokôzów, „fùl szczescô w òdnalézenim
zgrôwù żëcô” òddôł sã le sprawóm kaszëbsczim. W 1936r. znôw
przeszedł do robòtë szkólnégò. Pòsobną òprzestónkã w ùczeniu
miôł w latach 1941-1946. Wnenczas, przëmùszony przez leżnoscë,
wstąpił do Wehrmachtu. Pò tim wanożił pò Krece, Africe, Jitaliji.
Dostôł sã w britijsczi pòjmanié, jaż na òstatkù razã z armiją
dżenerôlë Andersa wôrdył do kraju. Na starkòwiznã warcył w
1964r. Żił w Lënii, ùcził téż w Zelewie, Skąpem k. Tornia,
w Bączu, Bãdargòwie, Czãstkòwie i pò kùńc w Tłuczewie, gdze
zegnôł slédné lata żëcô.
Szkòłowô dzejnota Aleksandra Labùdë, to jedna z wielu znanków
jégò warkòwi rësznotë. Béł téż pùblicystą. Debùtowôł w „Chëczë
Kaszëbsczi”, dodôwkù do „Gazétë Gdińsczi”. Pisôł téż w czwiercrocznikù
„Bëne i bùten”. Wszëtczi te pismiona bëłë zamikóné przez pòlską
władzą na Pòmòrzim. Pò interwëncëji direktora Pòmòrsczi Zrzeszë
Òbarnë Zôpadnëch Kresów, Grif Kaszëbsczi òstał zamkniãti,
bò „szerził westrzód Kaszëbów ùléwczi separatisticzné”.
Labùda, nimò pòsobny stracony biôtczi, sã nie pòddôł. W 1933r.
założił raza z Janã Trepczikã ë Janã Rompsczim, apartny cządnik
pòd titlã „Zrzesz Kaszëbskô”, jaczégò zéwiszcze bëło „W jimiã
Bòga - òdroda Kaszub”. Zrzesz nimò wielu zôwadów, ataków ze
starnë wëszëznów, przedërcha jaż do wëbùchù drëdżi wòjnë swiatowi,
a pùzni pò wòjnie òśta reaktiwòwónô.
W nôrodny pòlitice czerowelë sã wskôzama „równy z równyma”.
Nie chcëlë dopùscëc, żebë Kaszëbi bëlë traktowóny z górë,
abò spichòny do drëdżi katregòriji mieszkeńców. Te pòzdrzatczi
wëwòłałë òstrą kritika ze starnë wëszëznów. Doprowadzałë do
wielu kònfiskatów cządnika, a Labùda, jakò przédny redachtora,
béł dërchem wëstôwiony na ùlôżanié ze strónë wëszëznów. Czãstô
stôwôł przed sądã. Równak to mòcné karno nieùdżątëch lëdzów,
biôtkało dali, nimò tich wszëtczich bòlëznów ë òskarżeniów.
Aleksander Labùda prócz znónëch felietonów (pisónëch pòd pseudonimã
Gùczów Mack) ë mni znónëch wierztów, je téż autor „Dbë kaszëbsczégò
pisënkù ze prawòpisnym słowôrzã” (1939) ë „Kaszëbsczégò słowôrza”
(1960), ùdbónégò dlô szkólnëch niépòchòdzącëch z Kaszëbów.
Téż òstôł wëdóny w jednym tómie „Pòlskô - kaszëbsczi słowôrz
ë kaszëbskò-pòlsczi słowôrz” w òbrobienim Edwarda Brézë (1982).
Bëła to òsoba jak na ne czasë kòntrowersëjnô. Jak na dzyséjszé
- përznã bë béł mni. To òn ë jinszi Zrzeszëńcë, nie miôł strachù
gadac: kaszëbsczi jãzëk, kaszëbsczi nôród. Biotkòwelë ò ùznanié
kaszëbsczich jazëkòwëch ë kùlturowëch apartnotów. Òni, w swòjim
pismionie, wëstapilë z żadanim wòlnotë „Równoscë ë Sprawiedlëwòtë
dlô Kaszëbów”. To òni pòprzez swój lëteracczi ùróbk, a przede
wszëtczim taczé dokazë jak: drama „Arkòna” Jana Rompsczégò,
pòémã „Biôtczi mòrsczégò bòga” Jana Trepczika ë pòémã „Reknica”
Aleksandra Labùdë, wprowadzëlë do domôcy lëteraturë òdrodny
pierwińc.
Pò drëdzi „starnie barikadë” stoją lëdze, jaczi wiele zarzucają
Labùdze ë zaòstałim zrzeszëńcóm. Przede wszëtczim béł atakòwóny
za tak zwóné przeroscenié nôrodné z tendencëjama seperatëznyma.
Sóm Labùda zapiérôł sã témù, gôdającë, że òskôrżcë pòdchôdelë
do sprawë zgrôwno.
Pòsobna wëmówka bëła ze starnë prof. Bùkòwsczégò w „Kaszëbsczi
regjonalëznie”, tika antisemitiznë. Téż Labùda wëjasniô ten
zjawiszcze jakno zachòwanié takticzné. Zrzeszëńcë antisemitama
nie bëlë. Nimò tëch wszëtczich zastrzégów, Bùkòwsczi dostrzégô
téż pòzytiwné stronë Zrzeszëńców, to je dejowòsc, gòrącé ùlubienié
domôcy zemie. Przëcëskanié prôw do Gduńska ë Szczecëna.
Samémù Labùdze czãsto wëtikô sa mòckò to, że niezmùszony,
jidącë do Wehrmachtu, ùcwierdzôł swòjã lëbòsc ë felënk ùmòcnionëch
wskôzów, zapierającë spòdleczną dejã kaszëbsczi òbarnë procëmkù
germanizacëji. Jinszi dbë je Witôłd Bòbrowsczi, jaczi gôdô,
że w nëch czasach, prawie kòżden dozdrzeniałi chłop, jaczi
sã do tégò nadôwôł, béł w Wehrmachce. Abò béł volksdeutschã,
wnenczas dostôwôł miemiecczé domôctwò (òbiwatelsktwò) do òdwòłanô,
abò tégò ni miôł ë béł wëstôwiony na wënëkanié do Gùberniji.
Dodôwnym ùcażenim bëło to, że dostającë domôctwò miemiecczé
pò wòjne nie bëło dôwóné automaticzno pòlsczé nazôd. Całi
czas béł na miemiecczich papiórach, do 1952 r., ni mającë
prôw, jaczé przëstowałë fùlprawnym mieszkeńcom pòlsczim.
Pò wòjnie, czéj nastałë nowé czasë, Aleksander Labùda béł
òb całi czas pòd òbzérkã Służbë Ùbëtnoscë. W 1961. bëła dokònónô
rewizëjô w miészkaniach S. Bieszka, J. Rompsczégò ë A. Labùdë.
„Òjca òskôrżiwelë ò wespòłrobòtã z tzw. rewizjonistama miemiecczima,
z zomakama” - gôdô Bògùsława Labùda, jegò córka. Tadeusz Bòlduan,
w ksażce „Nie delë sã złómac”, pisze, że tak zwónô rewizjonizna
zôchòdnomiemieckô bëło wnenczas pòszëkòwim òskôrżenim, jaczi
władze wëcyga dlô ùscëgòwieniô Kaszëbów. Pùzni ta władzô sã
tak do tegò scwierdzeniô przënãcëła, że ùrzãdnicë w to ùwierzëlë
ë wëcygalë to przë kòżdi grôwce pòliticzny procëm Kaszëbóm.
Òb rewizëją w chëczë Aleksandra Labùdë, òsta dokònónô kònfiskata
gwësnëch rzeczi. Bëłë to lëstë pisóné pò miemieckù, jaczé
òtrzimiwôł òd swòjich sostrów, mieszkającëch w Austriji, òdjimczi
ë wiele manuskriptów pisónëch pò kaszëbskù. Òb całé przëszëkòwónié,
nie òstało nalazłé nick co bë mògło Labùdze tak pò prôwdze
zaszkòdzëc. Prôcownikóm Słëżbë Ùbëtnoscë nick dejade nie przeszkòdzëło
napisac, że lëstë bëłë pisóné pò bawarskù. Në czéj pò kaszëbskù
nie rozmielë…
Niedołgò pò tim zdarzenim, Labùda òstôł wërzucony z Kaszëbskô-Pòmòrsczégò
Zrzeszeniô. Tadeusz Bòlduan téż w „Nie delë sã złómac” pisze,
że nôprzód do karna Zrzeszëńców ùprocëmniło sã na zéńdzeniu
Głównégò Zôrzãdu Kaszëbskò-Pòmòrsczégò Zrzeszeniô 15 zélnika
1961r.
Nôprzód bëło zéńdzenié niechtërnëch człónczów Głównégò Zôrzãdu
z Sekretariatã KW PZPR. Na òglowim zéńdzeniu ze Zrzeszeniô
òdsadzony òstôł A. Labùda. W prawach człónków òstelë zawiészony
na cząd jednégò rokù S. Bieszk ë J. Rompsczi. F. Marszałkòwsczi
ë J. Trepczik òstalë ùpòmnióny, bë w przińdnocë pòstãpòwac
wedle sztatutu òrganizacëji. Pòdle relacëji Bòlduana, człónkòwie
Głównégò Zôrzãdu K-PZ, ùdżiãlë sã przed partã ë ùkôralë swòjich
drëchów le za to, że ti òbstojiwelë przë swòjich pòzdrzatkach.
Przédnictwò sã ùdżãło przed partã kòmùnysticznym, bò òsta
jima pòstôwionô alternatiwa: abò Zrzeszëńcë staną przed sądã
ë badą òbsądzony, abò Zrzeszenié sprôwi jich sprawã we swòjim
karnie. Zatem òsta wëbróné miészé złé, z nôdzeją, że nadéńdze
taczi sztërk, czedë to złé mdze mòżno naprawic. Bezprawné
pòstanowienié ò òdsadzenim Labùdë òstałô anulowóné dopiérkù
10 lôt pùzni, fòrmalno temù że bëło niezgódné ze sztatutã,
wjimno jakò czësto niedokôzóné. Z òbwinów nie òstôł obczëszczony
równak Aleksander Labùda. Pò prôwdze Bòlduan w swòji ksążce
pisze, że stało sã to wczasnij, ale nie pòdôwô datum, tak
jak to zrobił w przëtrôfkù Bieszka, Rompsczégò, Trepczika
ë Marszałkòwsczégò. Przindno Bòlduan òbsôdzô fakt doprowôdzeniô
nazôd człónkòwsczich prôw, jaczich Aleksander Labùda nie przëjił.
Kazëmiérz Kléina, wiceprzédnik K-PZ, zapitóny ò Aleksandra
Labùdã, gôdô: Tak pò prôwdze Labùda nigdë nie béł wërzucony
z K-PZ. Wiedno béł baro dokładno zrzeszony z zrzeszoną spòlëzną
ë pò prôwdze brôł dzél do kùńca w zéńzdeniach piszącëch pò
kaszëbskù, òrganizowónëch przez K-PZ. Za swòj pòzdrzatk, Labùda
we Zrzeszenim nie béł diskreditowóny, a jeżlë ju bëłë jaczé
swôrë to bëłë òne na òsonbòwim spòdlim.
Jak ju wczasni jô mia rzekłé, Aleksander Labùda to pòstacëjô
kòntrowersëjnô. Niechtërne faktë z żëcégò Labùdë, są jinterpretowóné
na wszëlejaczi ôrt ë pò prôwdze, pòstacëjô ta nie je nóm do
kùńca znónô. Wëdôwa bë sã, że setną roczëzna je bëlnô leżnosc
fùlnégò òdkrëcégò òsobë Aleksandra Labùdë ë ùtczëcô jegò ùróbkù.
Kaszëbskò-Pòmòrsczé Zrzeszenié, latos swiãtëje roczëznë zrzeszoné
z Hieronimã Derdowsczim. Ë ta gwësno pòstacëjô zwëprzédnia
zrzeszeniowe rozegracëje. Nie je to dejade znanka jaczi le
niechãcë dlô òsobë Aleksandra Labùdë a prosté niedozdrzenié
ti datë - wëjasniô Kazëmiérz Kléina.
Rolô Aleksandra Labùdë je jesz, nimò wszëtkò, nieuwôżônô.
Nié wszëtcë są w mòżnoscë zrozmiec ë dostrzéc jegò wialgòsc.
Niechtërny widzącë jégò nieuwôżnotã jakò człowieka, tak gò
próbùją òbszacowac - gôdô Witôłd Bòbrowsczi. Gwës Labùda béł
niepòkórną dëszą, ale téż człowiekã wiôldżégò dëcha ë bëlnym
Kaszëbą. Przez to że béł nade jinszima - je ë béł dlô wielu
niezrozmióny. Nimò, że ùszło ju wicy jak 20 lat òd jegò smiercë,
jegò deje nie òstałë pògrzebioné. Temù téż, chòc nié le, je
wôrt wiedzec ò tim wszëtczim, co dlô kaszëbiznë òn mô zrobioné.
Zabëwającë, zatrzéwùjemë jeden z nôwôżniészëch dzélów historëji
nôrodny juwernotë Kaszëbów.
Môłk je rzeczą lëdzką. Zëjącë ò bòlszewisczi, socjalistny
reżim, letkò bëło schadac z dardżi, ale równo ne czasë beznazôdno
ùszłë. Żëjemë w demòkratnim, prawòrządnym kraju, téj nôlegô
òstateczno pòzamëkac te lëstë ùszłotë, jaczé jesz nie òstałë
do kùńca wëjasnioné.
M. Bradtke
zaczątk
|