 |
| Czë wôrt je jic na welacëją
? |
Latos kùńczi sã nôslédnô kadencëjô teritorialny samòrządzënë.
Różnia sã òna òd nëch kadencëjów, jaczé bëłë przódë przede wszetczim
tim, że òznôcza òna zôczątk dzejaniô wòjewódzczi samòrządzënë
ë zlëkwidowónëch w 1975 rokù krézów. Wôżné je téż to, ë nót
je prze ti leżnoscë to pòdsztrichnąc, że bëła to piérszô dlô
Kaszëbów kadencëjô samòrządzënë w nowëch grańcach Pòmòrsczégò
Wòjewództwa, chterné òbjimô terô całé dzysdniowé Kaszëbë.
Terô, w rujanie, znôu bãdzemë szlë na welacëją przédnictwa najëch
gminów, gardów, krézów ë wòjewództwów. Jak mie sã zdôwô, wiele
ledzy nie bãdze miało za wiôldżégò lësztù, żëbë na nã welacëją
jic. Dosc teli ledzy mieszkô w baro cãżczich leżnoscach ë mô
tak pò prôwdze dosc wszelejaczi pòliticzi. Wiôldżi dzél ledzy
meszli, że wszetkò równo, chto bãdze nima rządzył, bò tak czë
jinak bãdze żle. Pòzdrzatk taczi, chòc w dzysdniowi cãżczi ùstawie
wielu familëjów jidze zrozmiec, nie je równak dobri. Tak sã
skłôdô, że welacëjô je to jeden niewielnëch momentów, czédë
ledze mają pò prôwdze wiôlgą szansã na to, bë miec jaczis cësk
na rządë. Ë chòdzy nama tuwò ò to, że wiôlgą szkòdą bëłobë nie
wëzwëskac ti szansë, jaką dôwô nama urządzenié naszégò państwa.
Gôdô sã czasã, że demòkracëjô je nôgòrszim z wszetczich pòrządków,
blós nick lepszégò do ti porë nicht nie wëmëszlił. Prôwdą je
téż, że nie ma niżôdny zôrãczi na to, że ti ledze, chternëch
latos wëbierzemë, bãdą sã bëlno sprôwialë na swòjëch stółkach.
Ale gwesné je to, że nie bãdze lepi, czej taczi lëdze, jak Wa,
Tczëwôrtny Czëtińcë, bãdą òb czas welacëje sedzec w chëczach
meszlącë przë tim: „Pò co móm tam jic, kò lepi ju ë tak nie
mdze”. Ti, co w czas welowaniégò sedzą blós doma ë niczim sã
nie czerują a pò pôru latach le jamrują, że dërch je zle, mògą
mieć zastrzedżi przede wszetczim do se. Kò doch pò to je welacëjô,
żëbë co jaczis czas òdsënąc òd rządów ledzy, co sã nama nie
widzą abò téż nie sprôwdzëlë sã na swòjëch stanowiszczach.
Przë leżnoscë gôdaniô ò latosy wëlacëji wdôrzëc mùszimë ò jesz
jedny baro wôżny rzeczë. Latos w direktnym wëlowanim wëbierac
bãdzemë wójtów najëch gminów ë bùrméstrów ë prezydentów najëch
gardów. Do ti pòrë prawò do tégò mielë blós radzëcelë. Òznôczô
to, że terô më wszëtcë, czëlë wëlownicë, zwëskëlë wikszi cësk
na to chto bądze rządzył najim nôblëższim òkòlim. W taczich
leżnoscach tim barżi nie mòżemë tégò nie uwôżac.
Wszetczima nama baro zanôlégô na tim, żëbë Kaszëbë corôz barżi
sã rozwijałë. Żëbë stałë sã corôz bògatszi ë lepi zadbóné. To,
czë taczé bãdą, w nôwikszim dzélu zanôléżné je to òd tégò, chto
bãdze rządzył najim wòjewództwã, krézã czë gminą. W kùńcu baro
wiôlgô grëpa sprawów wôżnëch dlô nas ë najich familëjów sprôwianô
je w gminie a krézu. Òsoblewie më, Kaszëbi, mùszimë ò tim wdarzëc.
Mùszimë naje sprawë wzyc, jak to sã gôdô, w swòje rãcë ë nimò
wszetkò dali rozkòscérzac dejã samòrządzënë, bò je to równak
nôlepszi ôrt na zarządzanié najim òkòlim. Chto w kùńcu wie lepi,
co pò prôwdze je nama pòtrzébné, Warszawa czë lëdze stądka?
Fòrmellów Słôwk
zaczątk
|
|
| 
Na Jinternece nigdë ni môsz
wszëtczégò…
żebë miec wiedno całą Òdrodã, wiedno na czas – òbacz tuwò
Mòżesz nas wspòmòc w wëdôwanim abò kòlpòrtażu?
Napiszë do naju! |
|
|
