Baro wôżną rzeczą w rozwiju òbéńdnym je belné dzejanié samòrządzënë
dlô dobra swòjëch mieszkańców. Tak sã skłôdô, że to prawie
samòrządzëna (òsoblewie gminnô) nôlepi znaje swòje òkòlé ë
co jemu jé nót. Pisôł jem ju perznã ò tim przódë, przë leżnoscë
łońsczi welacëjë do przédnictwa najëch gminów, krézów ë wòjewódzczi
autonomije. Chòdzy równak ò to, że wespół z nowima zadaniama
czãsto nie jidą do samòrządzënë nowé dëtczi. Finansowô sytuacëjô
gminów je cãżkô, co je gwesno zrzeszoné z krizysã publicznëch
finansów. Wëchôdô z tégò, że abë sygało dëtków na różné wiãkszé
dzejania samòrządzënów, nót je zwëskòwac dëtczi z bùtnowëch
(pòzabudżetowëch) zdrojów. Terô stôwô przed najima gminama
ë krézama wiôlgô szansa. Za jaczis czas Pòlskô mdze nôleżnikã
Europejsczi Ùnije ë bãdzemë mòglë starac sã ò dofinansowanié
najëch pòdjimiznów z ùnijnëch dëtków. Równak Ùnijô na bële
co dëtków dôwac nie mdze ë żebë dostac òd ni dofinansowanié
muszi miec ju przërechtowóné belné ùdbë tégò, co chce sã za
ne dëtczi zrobic a króm tegò samému wëgòspòdarzëc dzél pòtrzébnëch
dëtków. Dobrim ôrtã rëchtowaniô sã do przëjãcô ùnijnëch dëtków
mòże bëc na przëmiôr twòrzenié zdrëszënów, co parłączą gminë
ë jinszé jednostczi òbéńdowé samòrządzënë. Razã wiedno wiãcy
ë lżi jidze zrobic. Nót je równak do tégò belné wespółdzejanié
wielu ledzy ë jinstitucëjów a ò to ju nie je tak letkò.
Westrzód wszetczich ùnijnëch funduszów nôbarżi interesëje
nas Fundusz Òbéńdowégò Rozwiju. Célã jegò je wërównywanié
szansów midze różnyma òbéńdama. Dôwô òn tima biédnyma rejónama
mòżnotã nadgònieniô tëch bògatszich. Mô na niegò jic 4,4 miliarda
euro, w tim kòl trzech miliardów pòchòdzëc bądze z Europejsczi
Ùnijë, reszta zôs, jak jô ju przóde wspòminôł, wëgòspodarzëc
mają samé ti, co chcą dofinansowac swòje pòdjimiznë z ùnijny
kasë. Z detków tëch Pòmòrsczé Wòjewództwò dostac mô w latach
2004-2006 154,3 miliona euro. Gwesno kaszëbsczé a pòmòrzczé
jinstitucëje òb nen czas “nie spałë” ë przerëchtowałë dosc
teli ùdbów. Przenôlegają do nëch midzë jinszima: òdbudowanié
kòscoła sw. Jana we Gduńskù, przebùdënk kòmunikacëje we Wejrowie,
mòdernizacëjô drodżi z Rédë przez Wiôlgą Wies na Hél, szkòła
lëdowi rãczni robòtë w Swòrnëgacach. Króm tégò wëmienic mòżna
jesz òdnôwienié rôtësza w Słëpskù, mòdernizacëją drodżi z
Chòniców do Charzikòwów ë bùdowã kanalizacëjë w pucczim krézu.
Miejmë terô nôdzejã, że głos jich czëc bãdą warszawsczé ë
brukselsczé ùrzãdownicë.
Fòrmellów Słôwk
zaczątk
|