Ò tim jak szło dzéwczãcu, co miało krótczi
wid
Do Grotowé Julë różni kawalérze zachòdzą, ale że òna wej
mô kąsk ten krótczi wid, té òni le to zmądrzą. Jak ten òstatny
kawalér miôł tu na te wrëje przëjachac, tak òna niebòrôk chca
pòkazac, że òna ni mô te krótczégò widu i òna sã ùmówia ze
starą Grótką i pòłoża jigłã na zemiã. Jak ten kawaler béł
tam, a òni pilë kawã, tak Jula sã òdezwa do Grótczi: „Wécele,
mëmkò, na zemi jigła leżi”. Nen kawalér cos czuł ò jé krótczim
widze, ale skòrno òna tã jigłã widzã i pòdniosła, tak òn so
mëslôł: „Jednak to nie mùszi bëc prôwda. Jak to, wétale, lëdze
mògą zniesc”. I òn dostôł na Julã chrapkã. Ale złé prawie
chcało, że na stole stojôł talérz z masłã. – A mają té Groce
biôłégò kòta doma. – Terô Jula bëła té ùdbë, że to béł ten
kòt, tak òna prosto z górë w no masło rãką czapnã i zawrzeszcza:
„Pszé kòce! Pùdzesz të ze stołu précz! Të biesu, të, co jeden
biés jes!” Tej ten kawaler widzôł, co sã swiãcëło, a rôjca
téż.
Ò tim, jak Swiãto Rodzëna ùcékała do Egiptu
Czé Nôswiãtszô Panienka i swiãti Józef ùcékalë z Panem Jezusã
do Egiptu, té Herodowé wòjskò jich wnetkã miało. Té òni so
nie wiedzelë żódné radë. Ale sôł na pòlu kòl drodżi chłop
żëto. Tak Nôswiãtszô Panna rzekła do tegò chłopa, co to sôł:
„Dôj le mie tã sewankã. Jô bãdã sa”. Tak ten chłop ji dôł,
a òna zaczã sôc. Jak òna bëła na dredżim kùńcu, tak ten chłop
so przëzdrzôł: Té to żëto za nią slôdë bëło ju ùrosłé a dozdrzałé.
Té Matka Bòskô pòłożëła chùtkò sewankã, wzã Pana Jezuska na
klin a szła dali. A chłop biegôł dodóm za kòsą a zacząn to
żëto sec. W nim nëkô to wòjskò, a so pitô tegò chłopa, ëżle
òn nie widzôł, żebë tu dze dwòje młodëch lëdzy szło z dzeckã.
„Jô – òn rzekł – jak jem to żëto sôł, té tu szedł chłop z
białką a dzeckã”. Té ti żołnérze rzeklë: „Hô, hô, té chto
wié, dze òni ju terô są! Té më le móżemë chòróndżewkã zwinąc
a jic nazôd”. Tak òni so copnãlë a szlë.
Ze Słowôrza… Zëchtë przërëchtowôł Jôbard
zaczątk
|