 |
| Wëstôwk nôstarszi kaszëbsczi pismieniznë
|
 16
gòdnika w wejrowsczi Mùzeji Mùzëczi i Pismieniznë Kaszëbsko-Pòmòrsczi
mia môl ùroczësté òdemkniãcé wëstôwkù, jaczégò jesz na kaszëbsczi
zemi nie bëło. W przëtomnosce midzë jinszima starostë Józwë
Reszkégò i bëlnégò znajôrza kaszëbsczégò jãzëka, mieszkeńca
gardù Wejra, prof. Jerzégò Trédra, direchtor Mùzëji, Bògùsłôw
Bréza przëwitôł gòscy, a wastnô kùstusz Grażina Wirkùs rzekła
czile słowów o przerëchtowanim nëgò niecodniowégò wëstôwkù.
A no przërëchtowanié nie bëło letką sprawą, bò wnet wszëtczé
ekspònatë bëło nót sprowadzëc ze zbiérów jinstitucëji bùten
Kaszëb. Ne, co są gromadzoné w greńcach Pòlsczi, ùdało sã wejrowszczim
mùzejnikóm wëpożëczëc i zrëchtowac piãkny symboliczny przezérk
wielestalatnëch tradëcëji kaszëbsczi pismieniznë. Felô leno
oridżinalnëch wëstôwin z niémiecczich archiwów z Berlina i Greiswaldu,
dze téż je dosc teli stôrich pamiãtkôw najégò pisënkù. Ale nawetka
króm tegò, wëstôwk bùdzy zdzëwòwanié dlô trëdu i robòtë, wëkonóny
dlô zajistnieniô ny ambitny a brëkòwny ùdbë.
I dzãka temù, pierszi rôz w historëji, mômë leżnotã òbezdrzec
w jednym placu wszëtczé nôstarszé przëmiarë naji tatczëznowi
pismieniznë. Òd Dëchòwnëch piesni dr. Môrcëna Lëtra z 1586 r.
ë Môłi katéchizm niemieckò-wandalsczi abò słowiãsczi z 1643
r. przez tzw. perikópë smôłdzyńsczé (XVII/XVIII w.), przësãdżi
z Wierzchòcëna z lat 1706-22 czë rãkòpis słowôrzka Mrągòwiusza
z 1826 r. jaż pò 19. stalatné ksãżczi Floriana Cenôwë, taczé
jak: Pjńc głównëch òdzałów ewanielicczégò katéchizmù z 1861
r. i Zarës do gramaticzj kaszëbskò-słowińsczi mòwë z 1879 r.
Wôrtnota nëch wëstôwin je tak wiôlgô, że wëstôwk ùdało sã zjiscëc
midzë jinszima leno dzãkã jednymù z dobrzińców, tj. Jinspektoratòwi
PZU w Wejrowie, jaczi sã zgòdzył wëstawic darmôk pòlisã òd wszelejaczich
nieszczëstliwëch przëtrôfków, co bëło pierszą zastrzegą jinstitucëji,
chtërne pòżëczëłë ekspònatë ze swòjich zbiérów.
Wëstôwk mdze dérował nôkrócy do kùńca gromicznika i jidze gò
òbezdrzec co dzéń ód pòniedzôłkù do piątkù w gódz. 8-15 w sedzbie
Mùzeji w Wejrowie przë szaseji Zómkòwi 2A (ul. Zamkowa). Czej
chto chce to zrobic w jinszim czasu, téż je to mòżlëwé, leno
pò wczasniészi zgłoszenim do przédnictwa Mùzeji ( tel 672 29
56).
P.Bréza
zaczątk |
|
|
