17. 01. minã 4. roczëzna smiercë ks. prałata Hilarégò Jastaka,
zwónégò Królã Kaszëbów. Ksądz Jastak z Kòscérzënë béł dëchòwim
prowôdnikã żôłnérzów Krajewi Armije ë Szarëch Szeregów òb
2. Swiatową Wòjnã. Òb czas PRL-u dzejôł aktiwno jakno direchtór
gdińsczégò CARITAS ë béł zdrëszony z òpòzycëją. Dzãka jegò
staróm òstôł wëbùdowóny we Gdini kòscół Nôswiãtszégò Serca
Pana Jezësa. To wszëtkò sã nie widzało władzóm, ë bez to béł
dërch ùscegòwiony. ùmarł mającë 85 lat.
Òd 85 do 120 zł co miesąc dostóną nôlepszi ùczniowie ë sztudérzë
z Kòscérzënë. Tam prawie bùrméster 28-u młodim lëdzóm przëznôł
sztipendije. Ò sztipendiją biôtkało wicy jak 50 òsób. Nôdgroda
je achtniãcym sukcesów, a głównym jich miernikã bëła strzédnô
òcenów. ùroczësté wrãcziwanié mdze 31. stëcznika w kòscérsczim
magistriace.
„Nié” dlô westrzédnopòmòrsczégò. Kaszëbskò-Pòmòrsczé Zrzeszenié
wëdało òficjalné stanowiszcze procëm włączeniémù pòwiôtów
słëpsczégò, człochòwsczégò, lãbòrsczégò ë bëtowsczégò do ùdbónégò
nowégò wòjewództwa. Przeprowadzenié taczégò pòdzélu bë spòwòdowa
nienormalną sytuacëją, nié do lëdaniégò przez kaszëbską spòlëznã
- òsta napisóné w òswiôdczenim. Na skùtk samòrządowi refòrmë
sprzed 6 lat, chòc Kaszëbi nalézlë sã w jednym wòjewództwie,
nie òstôł stwòrzony dosc bëlny system samòrządnoscë - ti dbë
są przédnice Zrzeszeniégò. Procëm nowémù wòjewództwù są téż
dzejarze pòmòrsczich prawicowëch partów: Lëdżi Pòlsczich Rodzënów,
Ùnije Pòliticzi Realny a téż Prawa ë Sprawiedlëwòtë. Ti zarzeszëlë
we Słëpskù kòmitet procëm westrzédnopòmòrsczémù. Wôrt je przebaczëc,
że ze 140 tës. pòdpisënków pòd złożoną w kùńcu rokù w Sejmie
ùdbą 17. regionu, le 28 tës. je ze słëpsczi òbéńdë.
Gmina Przedkòwò dożda sã w pòłwie stëcznika dëtków z SAPARD-a.
Rozbùdowa kanalizacyjny sécë na jaką gmina dosta pół milijona
złotëch, òsta zrealizowónô łoni. Na 2004. rok gmina téż mô
składłé ùdbã do negò fùndusza - tim razã na rozbùdacëją kòłowich
stegnów. Nen program mdze ùjawernióny wespół z piãcoma jinszima
gminama kartësczégò pòwiôtu.
Nôdgroda Bùrméstra Rëmie dlô Alfònsa Zwarë, „Naszégò Dodomù”
ë Grażënë Manikòwsczi. Jedenôsti ju rôz bùrméster przëznôł
no wëprzédnienié, a je to prócz figùrczi téż kòl 1600zł. Grażëna
Manikòwskô ë Òstrzódk Wëchòwawczi „Nasz Dodóm” dostelë jã
za dzejanié dlô dzeców z zôgrożonëch rodzënów. Alfòns Zwara
- za swòje malënczi ë złobiórstwò. Òd 1993 rokù wëprzédnionëch
przez bùrméstra òstało ju 53 òsób.
„Ambasador kartësczégò pòwiôtu” dlô aktorczi Danutë Stenczi,
titel firmë rokù negò pòwiatu dlô Arytona z Chmielna, a kùlturalnim
zdarzenkã rokù bëłë Jazzowi Zaduszczi w Galerii Refektarz.
To le blós niechtërne nôdgrodë pòwiôtu kartësczégò jaczé òstałë
wrączony w piątk. „Perła Kaszëb” bò tak so zwie na nôdgroda
je przeznowónô za òsoblewą promòcją kartesczich stronów. Króm
diploma laureacë téż dostôwają prôwdzëwą perłã jakô je wtopionô
w tabaczéra zrechtowónô bez Rudolfa Krãcczégò z Brodnicë.
Danuta Stenka rodã z Gòwidlëna leno co dosta nôdgrodã òd cządnika
Pòlitika, a 12.01. w I programie Pòlsczi Telewizëje ò pół
dzesąti wieczór bëła do òbezdrzeniô w téatrowim dokòzu Władysława
Zawistowsczégò “Bëlny adres”.
Ùstka mô érowëch ambasadorów. Je to le wëprzédnienié a nié
ùrząd, równak je to achtniãcé. Są nima te òsobë, co bëlno
przëłożëłë rãkã do rozwiju ë promòcëje ùstczi, a przëznôł
ne nôdgrodë bùrméster negò gardu. Ambasadorã spòrtowim je
Barbara Madejczik, mésterka Pòlsczi ë złotô medalistka z Kòreje
w cësniãcym òszczepã; mùzycznym - pisniarka Ana Hòdina. Òsta
wprzédnionô téż Zrzesz Ùstecczich Zrzeszów - òrganizatora
Festiwalu Fajerwerków ë na gònie ùpiãkszeniégò miasta - gòscyńc
Rejs ë przédnik Zrzeszë Spòlëznowi Bùdowiznë - Edward Rokòsz.
Za eurodëtczi w Sëlëczënie mdą mielë wòdã! Gmina ùdbô wëbùdowac
nowé wòdocëdżi za kòl 800 tës zł. Nëch nôbarżi je nót w sołectwach
Pòdjazë ë Zdënôjce. Na lëni Widnô Góra - Pòdjazë - Amalka
wòdocëdżi mdą kładłé w tim ë przindnym rokù. W gminie kòl
13 procentów gòspòdarstwów nie je pòdłączonëch do wòdny sécë.
Sztróm z wiatru. Na mòrzu kòl Lubiatowa w gminie Chòczewò
mô pòwstac zacht wiatrowô farma. Jinwestorã je warszawskô
firma „Czystsza energia”. To je wiedzec, że przez elektrownią
mòże sã zmiészëc lëczba turistów w gminie. Bez to władze gminë
bëłë temù procëm, terô równak sã zgôdzają. Czemù? Je prawie
rechtowóny ùgôdënk midzë jinwestorã a gminą. - W nym je pisóné,
że firma pòmòże stwòrzëc szaseje ë wòdocëdżi w gminie - rzecze
Pauel Dąbek, jinspektór do sprôw jinwesticëjów. Dosebno sã
dzeje w Gduńsczi Energeticzny Kòmpaniji - ta mô pòdpisóné
ùgôdënk z niemiecką firmą MVV. Chce òna téż robic sztróm z
wiatru, a pùzni przedawac gò gduńsczi energetice. Równo Chòczewò
jak ë Gduńsk zdrzą w przindnotã: w 2010-im rokù weńdze prawò,
że 7.5 proc. elektriczny stëtkòscë mô bëc z òdnawialnëch zdrzódłów.
Biuro Òbiwatelsczich Infòrmacëjów rëgnãło w Mirochòwie, w
kartësczim krézu. Dzejô w òbremienim Centra Lokalny Aktiwizacëje,
a w nim żdają na pëtania m.jn. prôwny redca, robòtnik Òstrzódka
Spòdlëczny Pòmòcë ë Òstrzódka Gbùrsczégò Doradztwa. Dzãka
pòwòłaniémù Biura mieszkeńcowie ni mùszą dojeżdżiwac 20 km
do Kartuz, żebë załatwic niechtërné sprawë a téż żebë dowiedzec
sã jak ë jak nôlepi załatwic swòje sprawë.
przërëchtowôł P.Kąsk
zaczątk |