Ò tim, jak pón chcôł smierc przechitrzëc
Béł baro bògati pón. Do niegò przëszła smierc i gòdô: Pòj
le sa ze mną. A òn jã prosy, żebë mù darowa rok żëcô. Smierc
so zmiłowa nad nim i rzekła: „Dobrze, jak të chcesz, za rok
jô przińdã nazôd, ale żebë të béł przëgòtowóny”. Ale nen pón
nie béł taczi głupi i sobie mëslôł: „Gadé le, co chcesz, jô
badã wiedzôł, co zrobic”. Całi rok òn fùdrowôł kònie, a òne
bëłë pãkaté jak beczczi. Jak rok ju béł wnet miniãti, pón
wzął kònie, zaprzigł je w mòcné sla i chcôł smiercë ùjachac.
Òn nëkôł trzë dni. Jachôł jak kònie mògłë nadążëc i wjachôł
na wialdżé pòpławë. Wtim òn widzy: na kãpie sedzy smierc.
Miała nodżi założoné i òstrzëła kòsã. „Alana! – òna rzekła
– to le tak bëło, że të na czas zdążił. Të mùszôł jachac jak
pùrtk”.
Ò tim jak dzéwczã tuńcowało z pùrtkã
Bëlë rôz we wsë tuńce. Nazebrało so młodëch skòpicą karczma.
Mùzëkencë rżenë jednégò za drëdżim, le so bùda rëszała jakbë
bôt na mòrzë. Dzéwczãta wëstrojoné jak pùpë wëwijałë z parobkama,
le czedlama zacigalë jizba. Prawie jedna ni mia szczescégò.
Nicht jakùsz ni miôł na niã òka. Sedza nasowiałô w nórce i
wzdicha sama do se, żebë chòc chtos so zlitowôł i wzął ją
do tuńca, ale jak nic tak nic. Dzéwczinczëszczë tak bëło,
jakbë jã chto nagô w zôgawice wsadzył, bò to je marnô sromota
sedzec na mùzëce w nórce, a wcyg òczamë strzic. A chòc bë
ju sóm pùrtk z piekła przëszedł – pòmëslëla so – to bëm a
nim zatencowała. Bëlno jé to przez głowa przelecało, zrobił
sa ramór, jakbë so karczmiszcze walëło i wlecôł złi dëch z
wialdżima rogama i ògniã w muni. Trzasł kòpëtama w déle, czapnął
dzéwcza za czedle i rwôł z nią, to le so smród czadzył. Wnim
w karczmie jakbë chto wëmiótł, ani żëwi dëszë nie òsta. Wszëtkò
dzes so zapòdza, le pòtemù so ò pòcëszkù pòwiôdalë, jak nen
czôrni z rogama, z kùńską szpérą i krowim ògóna czapnął dzéwcza
do piekła, co chcało z nim teńcowac na mùzëce.
Ze „Słowôrza…” Zëchtë przërëchtowôł Jôbard
zaczątk
|